ភាពជោគជ័យនៅកម្ពុជាពីមុនមកបូករួមនឹងការយល់ពីកីឡាករខ្មែរបានច្រើន គឺជាដើមចមដែលក្លិបបាល់ទាត់បឹងកេតសម្រេចតែងតាំងលោក Apisit Im Amphai គ្រូបង្គោលថ្មីសម្រាប់រដូវកាល២០២០។ នេះបើតាមការបង្ហើបឲ្យដឹងពីអគ្គលេខាធិការក្លិប លោក បែ មករា។
ថ្នាក់ដឹកនាំក្រុមជើងឯកពានរង្វាន់សម្ដេចអគ្គមហាសេនាបតីតេជោ ហ៊ុន សែន បន្ថែមថា ក្លិបក៏ចង់មានការផ្លាស់ប្ដូរអ្វីថ្មីៗ ហើយយោងតាមសមិទ្ធផលដែលគ្រូបង្វឹកជនជាតិថៃខាងលើធ្លាប់មាននៅកម្ពុជា លោកជឿថា នឹងមានភាពកាន់តែប្រសើរនៅរដូវកាលថ្មី។
លោក បែ មករា ពន្យល់ ៖”យើងចង់បានអ្វីដែលថ្មី ដើម្បីអភិវឌ្ឍកាន់តែប្រសើរ ហើយយើងមើលឃើញសមត្ថភាព ភាពប៉ិនប្រសព្វរបស់គាត់ សំខាន់បំផុត គឺគាត់យល់ពីកីឡាករខ្មែរច្រើន អ៊ីចឹងយើងសម្រេចចិត្តយកគាត់មក ដើម្បីឲ្យមានការផ្លាស់ប្ដូរថ្មីៗក្នុងក្រុម”។
គួរដឹងដែរថា លោក Apisit Im Amphai ធ្លាប់ដឹកនាំភ្នំពេញក្រោនឈ្នះពានរង្វាន់សម្ដេចតេជោ ហ៊ុន សែន ឆ្នាំ២០០៨, ២០០៩ និងលីគកំពូល ឆ្នាំ២០០៨ និង២០១០។ កិច្ចសន្យារបស់លោកនៅបឹងកេត គឺមានសុពលភាពមួយឆ្នាំ៕