នៅនាទី៧២ ខ្សែប្រយុទ្ធ Canavi ដែលរកគ្រាប់បាល់នាំមុខឱ្យអ៊ុយរុយហ្គាយ ២-១ លើក្រុមព័រទុយហ្គាល់នោះ បានរករបួសសាច់ដុំ បណ្ដាលឱ្យគេត្រូវដើរចេញពីទីលាន។
ដោយសារតែមានអាការៈឈឺជើងខ្លាំងពេក ពេលក្រោកឈរនោះ កីឡាករដំបូងគេដែលសម្រេចចិត្តទៅជួយគ្រា Cavani មិនមែនមិត្តរួមក្រុមរបស់គេឡើយ។ ផ្ទុយទៅវិញ គឺ Cristiano Ronaldo ទៅវិញទេ ដែលបានទៅជួយគ្រាចេញ ហើយក៏បានបង្ហាញកាយវិការថាមិនប្រញាប់ដើម្បីលេងបន្ដដែរ។ Ronaldo បានដើរមួយៗជាមួយ Cavani ដើម្បីកុំឱ្យរបួសឈឺកាន់តែខ្លាំង។
ចំណុចនេះហើយ បានធ្វើឱ្យអ្នកគាំទ្រទះដៃ និងកោតសរសើរចំពោះទឹកចិត្តរបស់ Ronaldo ជាពន់ពេក ក្នុងនាមជាកីឡាករបាល់ទាត់ម្នាក់ មានទឹកចិត្តជាកីឡាពិតៗ មិនមែនចង់តែឈ្នះមួយមុខនោះទេ។ បើទោះជាក្រុមមិនទទួលបានលទ្ធផលឈ្នះមែន ប៉ុន្តែ Ronaldo បានឆក់យកទឹកចិត្តអ្នកស្រលាញ់កីឡាជាច្រើនរួចជាស្រេចទៅហើយ ចំពោះទង្វើរបស់ខ្លួនកាលពីយប់មិញនេះ៕ប្រភព៖ MARCA
