បន្ទាប់ពីយកជ័យជម្នះទៅលើម៉ាឡេស៊ី ៣-១ ទីបំផុតក្រុមបាល់ទាត់ U22 របស់កម្ពុជាបានសាងប្រវត្តិសាស្រ្តឡើងទៅកាន់វគ្គពាក់កណ្តាលផ្ដាច់ព្រ័ត្រនៃព្រឹត្តិការណ៍ស៊ីហ្គេមជាលើកដំបូង ទន្ទឹមពេលដែលហ្វីលីពីនជាក្រុមមានឱកាសត្រូវទីម័រវាយបកគ្រាប់បាល់ចុងម៉ោង ៦-១។
មកទល់ពេលនេះកម្ពុជាត្រូវរង់ចាំអុតមើលលទ្ធផលពីក្រុមដែលខ្លួនត្រូវតតាំងនៅវគ្គ ៤ ក្រុមចុងក្រោយនាថ្ងៃទី ៧ ធ្នូ ដោយរួមមានវៀតណាម ថៃ ឬឥណ្ឌូណេស៊ី។ កម្ពុជាដែលជាក្រុមឈរលេខពីរនៅពូល A ត្រូវតតាំងក្រុមឈរលេខមួយនៅពូល B។
បច្ចុប្បន្នវៀតណាមកំពុងនាំមុខកំពូលតារាងមាន ១២ ពិន្ទុ ហើយប្រកួតចុងក្រោយត្រូវប៉ះថៃបែបនេះប្រសិនស្មើឬឈ្នះ នោះវៀតណាមនឹងត្រូវប៉ះកម្ពុជានៅវគ្គបន្ទាប់។ ប៉ុន្តែក្នុងលក្ខខណ្ឌវៀតណាមចាញ់ ហើយថៃយកឈ្នះដាច់ ៤ គ្រាប់ ជួនពេលឥណ្ឌូណេស៊ីត្រូវស្មើឬចាញ់ទល់ឡាវ នោះគូតតាំងនៅវគ្គបន្ទាប់របស់គោព្រៃ គឺត្រូវប៉ះក្រុមដំរីថៃ។
នៅលក្ខខណ្ឌស្មុគស្មាញមួយផ្សេងទៀត គឺប្រសិនទាំងឥណ្ឌូណេស៊ី និងថៃអាចយកជ័យជម្នះ នោះនឹងមានការប្រៀបធៀបគ្រាប់បាល់ ហើយក្រុមដែលនាំមុខគ្រាប់បាល់គឺត្រូវចាប់ឲ្យជួបកម្ពុជាដើម្បីជម្រុះយកក្រុមខ្លាំងឆ្ពោះទៅវគ្គផ្តាច់ព្រ័ត្រ៕