បរាជ័យក្រោមថ្វីជើងបារាំង ៤-៣ យប់មិញ បានធ្វើឱ្យអាហ្សង់ទីនហាលអាវនៅព្រឹត្តិការណ៍ FIFA World Cup 2018 ត្រឹមវគ្គ១៦ក្រុមចុងក្រោយនេះហើយ។
ទម្រង់លេងអាហ្សង់ទីន មុនការចាញ់យប់មិញទៀត ក៏ត្រូវបានគេរិះគន់មិនតិចដែរ។ ជាពិសេសលោក Jorge Sampaoli គ្រូបង្វឹកផ្ទាល់តែម្ដង ដែលតែងតែនិយាយលើក Lionel Messi ខ្លាំង ហើយទៅបង្អាប់កីឡាករដទៃទៀត។ រហូតដល់មតិខ្លះ បានយល់ឃើញថាសម្តីរបស់គ្រូបង្វឹករូបនេះ ហាក់ដូចជាមិនសមក្លាយខ្លួនជាគ្រូក្រុមជម្រើសជាតិធំមួយនោះទេ។
Eric Cantona អតីតកីឡាករកំពូលរបស់ Manchester United បានបង្ហាញអារម្មណ៍ចំពោះគ្រូបង្វឹកខាងលើថា៖ “Lionel Messi ប្រហែលជាមិនទាន់អាចល្អបំផុតលើលោកទេ (Greatest of All Time) ប៉ុន្តែច្បាស់ណាស់គាត់អាចធ្វើជាគ្រូបាន។ ពេល Sampaoli សួរគាត់ពីការដូរកីឡាករ នោះគឺច្បាស់ណាស់ថា លោក Sampaoli គ្មានចេះអ្វីនោះទេ។ Sampaoli ដូចជាអ្នកធ្វើការនៅក្លឹបរាត្រី ដែលមិនដឹងសូម្បីថានរណាត្រូវដាក់ចូល និងដកចេញ”។
អាហ្សង់ទីន បរាជ័យលើកនេះ អាចនឹងប៉ះពាល់ដល់តំណែងរបស់លោក Sampaoli ជាក់ជាមិនខាន ត្បិតអីតាំងពីវគ្គក្នុងពូលដែលចាញ់ក្រូអាត ៣-០ នោះ មានអ្នកគាំទ្រជាច្រើន ចង់ឱ្យសហព័ន្ធបាល់ទាត់អាហ្សង់ទីន បណ្ដេញគ្រូបង្វឹករូបនេះចេញទៅហើយ៕ប្រភព៖ DailyMail