ក្រុមបាល់ទាត់ជម្រើសជាតិអាហ្សង់ទីនបានធ្លាក់ចេញពី World Cup 2018 ត្រឹមវគ្គ១៦ក្រុមចុងក្រោយហើយ ក្រោយពីចាញ់ក្រុមបារាំង ៤-៣។
បរាជ័យនេះដែរ បានធ្វើឱ្យកីឡាករក្នុងក្រុមទាំងមូលហាក់ដូចជាមិនសប្បាយចិត្តនោះទេ។ តួយ៉ាងដូចជាខ្សែការពារ Javier Mascherano បានប្រកាសថាវាដល់ពេលដែលខ្លួនត្រូវចូលនិវត្តន៍ពីក្រុមជម្រើសជាតិអាហ្សង់ទីនហើយ។ “សម្រាប់ខ្ញុំផ្ទាល់ លេងឱ្យជម្រើសជាតិគឺដល់ពេលបញ្ចប់ហើយ។ ពីថ្ងៃនេះទៅ ខ្ញុំនឹងក្លាយជាអ្នកគាំទ្រម្នាក់របស់ក្រុមអាហ្សង់ទីន។ វាជាពេលនិយាយពាក្យលាសម្រាប់ជម្រើសជាតិ។ ខ្ញុំសង្ឃឹមថាទៅថ្ងៃមុខ កីឡាករក្មេងៗរបស់យើងនឹងធ្វើកាន់តែល្អ”។
Mascherano វ័យ៣៤ឆ្នាំលេងឱ្យក្រុមជម្រើសជាតិអាហ្សង់ទីនបាន១៤៥ប្រកួតមកហើយ។ នេះបានបង្កើតជាកំណត់ត្រាមួយដែលរូបគេ ជាកីឡាករលេងឱ្យក្រុមជម្រើសជាតិបានច្រើនជាងគេ។ មិនត្រឹមប៉ុណ្ណឹងទេ ការប្រកាសចាកចេញពីជម្រើសជាតិនេះ ក៏អាចប៉ះពាល់ដល់ Lionel Messi ផងដែរ ត្បិតអីកីឡាករ២នាក់នេះ ធ្លាប់ប្រកាសចេញពីជម្រើសជាតិដូចគ្នានៅឆ្នាំ ២០១៦ ហើយក៏ចូលវិញព្រមគ្នាផងដែរ៕ប្រភព៖ DailyMail