ខ្សែបម្រើ Willian បានប្រកាសហើយថាខ្លួននឹងមិនចាកចេញពីក្រុម Chelsea នៅខែមករាខាងមុខនេះទេ បើទោះជាបច្ចុប្បន្នខ្លួនមិនសូវបានចូលលេងក៏ដោយ។
Willian នឹងអស់កុងត្រាជាមួយក្រុមតោខៀវនៅត្រឹមរដូវកាលនេះហើយ។ រូបគេមិនទាន់បានទទួលសំណើកុងត្រាថ្មីណាមួយនៅឡើយទេ ហើយបច្ចុប្បន្នក៏មានក្លឹបជាច្រើនចង់បានកីឡាករប្រេស៊ីលនេះដែរ។ យ៉ាងណាមិញ សាមីខ្លួននៅតែស្រលាញ់ក្រុម Chelsea ដដែល ហើយបញ្ជាក់ទៀតថាខែមករាខាងមុខ បើទោះជាមានឱកាសចាកចេញ ក៏ខ្លួននឹងមិនទៅណាដែរ។
កីឡាករវ័យ៣១ឆ្នាំបាននិយាយដូច្នេះថា៖ “ខ្ញុំមិននិយាយជាមួយក្រុមណាទេ ព្រោះខ្ញុំមានកុងត្រារហូតដល់ចប់រដូវកាលនេះ។ ខ្ញុំជាកីឡាករ Chelsea ហើយខ្ញុំដឹងថាក្លឹបយល់ពីខ្ញុំ ថាខ្ញុំចង់បានអ្វី។ ខ្ញុំសប្បាយចិត្តនៅទីនេះ សប្បាយចិត្តបានលេងឱ្យក្រុមនេះ។ ប៉ុន្តែកាលៈទេសៈនេះ វាស្ថិតនៅលើដៃថ្នាក់លើ មិនមែនក្នុងដៃខ្ញុំឡើយ។ ខ្ញុំនឹងរង់ចាំការបន្ដកុងត្រាជាមួយពួកគេ”៕ប្រភព៖ Dailymail