Thomas Tuchel អ្នកចាត់ការក្រុម PSG បានបញ្ជាក់ថាការចង់បានរបស់ Zidane មកលើខ្សែប្រយុទ្ធ Mbappe គឺជារឿងមិនអាចទៅរួចនោះទេ ព្រោះកីឡាករបារាំងនេះមិនមែនសម្រាប់លក់ឡើយ។
Zidane បានបង្ហើបថាលោកស្រលាញ់និងពេញចិត្តទម្រង់លេងរបស់ Mbappe ច្រើនឆ្នាំមកហើយ ដោយសង្ឃឹមថានឹងមានឱកាសណាមួយអាចមកធ្វើការជាមួយគ្នាបាន។ ទន្ទឹមគ្នានេះដែរ លោក Thomas ដែលជាអ្នកចាត់ការក្រុម PSG វិញ ក៏ឆ្លើយតបចំពោះរឿងចង់បានរបស់ Zidane នេះដែរ។
លោក Thomas បានបញ្ជាក់យ៉ាងច្បាស់ថា៖ “ខ្ញុំមិនដឹងថា Zidane ពេញចិត្ត Mbappe ប៉ុណ្ណាទេ ប៉ុន្តែគាត់ជាកីឡាករសំខាន់សម្រាប់ក្រុមយើង ហើយយើងសប្បាយចិត្តដែលមានវត្តមានគាត់នៅជាមួយ។ ជួនកាល អ្នកស្រលាញ់កីឡាករម្នាក់នេះ ទាំងដែលគេមិនមែនសម្រាប់លក់នោះទេ”។
រំលឹកថានៅយប់នេះ ក្រុម Real Madrid នឹងបើកកីឡដ្ឋានរបស់ខ្លួនស្វាគមន៍ក្រុមភ្ញៀវ PSG សម្រាប់ការប្រកួតសន្សំពិន្ទុពានរង្វាន់ UEFA Champions League ៕ប្រភព៖ Marca
