ក្រុម Juventus នឹងត្រូវបើកកីឡដ្ឋានរបស់ខ្លួនស្វាគមន៍ក្រុមភ្ញៀវ Atletico Madrid វេលាម៉ោង៣ទាបភ្លឺនេះ ក្នុងពានរង្វាន់ UEFA Champions League ។
នេះជាការជួបគ្នាម្ដងទៀតហើយសម្រាប់ក្រុម AT Madrid តទល់ជាមួយខ្សែប្រយុទ្ធមុតស្រួច Cristiano Ronaldo ។ យ៉ាងណាមិញ លោក Simeone អ្នកចាត់ការក្រុម AT Madrid បានប្រាប់ទៅអ្នករាល់គ្នាថាបំភ្លេចរឿងនិងកំណត់ត្រារបស់ Ronaldo ជាមួយក្រុមរបស់លោកទៅ ព្រោះថាការប្រកួតនេះ គឺជាការប្រកួតរវាងក្រុម Juventus និងក្រុមរបស់លោក។
“Cristiano Ronaldo គឺជា Champions ហើយយើងមិនអាចនិយាយអ្វីផ្សេងទៀតទេ។គាត់គឺលេខ១ ហើយតែងតែផ្លាស់ប្ដូរការប្រកួតបានជានិច្ច។ តែទោះជាយ៉ាងនេះក្ដី ខ្ញុំមិនគិតថាប្រកួតនេះគឺ Ronaldo តទល់ជាមួយក្រុម AT Madrid ទេ យើងមកលេងដើម្បីទល់ក្រុម Juventus ”។ សម្ដីរបស់លោក Simeone។
កាលពីជើងទី១កន្លងទៅ នៅទឹកដីក្រុម Atletico Madrid ក្រុមទាំងពីរលេងបានត្រឹមស្មើគ្នា ២-២។ ដោយបច្ចុប្បន្ននេះឆ្លងកាត់៤ប្រកួតក្រុម Juventus នៅឈរកំពូលតារាងមាន១០ពិន្ទុ ស្របពេល AT Madrid វិញនៅលេខ២មាន៧ពិន្ទុ៕ប្រភព៖ Marca
