• អតីត​ខ្សែ​ប្រយុទ្ធ​អ៊ុយរុយហ្គាយ៖ ​បិទ Ronaldo ​ឱ្យ​ជាប់ គឺ​ស្មើ​បិទ​ព័រទុយហ្គាល់​បាន​ហើយ

    Diego Forlán ​អតីត​ខ្សែ​ប្រយុទ្ធ​របស់​អ៊ុយរុយហ្គាយ ​ដឹង​ច្បាស់​ថា Cristiano Ronaldo ​គឺ​ជា​ចំណេក​៥០​%​នៃ​ក្រុម​ព័រទុយហ្គាល់ ដូច្នេះ​ប្រសិន​បើ​បិទ​កីឡាករ​រូប​នេះ​ជាប់ ​នោះ​ស្មើ​នឹង​បិទ​ព័រទុយហ្គាល់​ជាប់​ដែរ​ហើយ។

    អ៊ុយរុយហ្គាយ ​នឹង​ត្រូវ​តតាំង​ជាមួយ​ក្រុម​ព័រទុយហ្គាល់ ​នៅ​វគ្គ​១៦​ក្រុម​ចុង​ក្រោយ FIFA World Cup 2018 ​នៅ​ប្រទេស​រុស្ស៊ី ​វេលា​ម៉ោង​១​រំលង​អាធ្រាត្រ​នេះ។ ​អ៊ុយរុយហ្គាយ ​ជា​ក្រុម​មួយ​ដែល​មិន​ទាន់​របូត​១​គ្រាប់​នោះ​ទេ ​ឆ្លង​កាត់​៣​ប្រកួត​មក​នេះ។ ស្រប​ពេល​ដែល​ខាង​ព័រទុយហ្គាល់​វិញ ​Ronaldo ​រក​បាន​៤​គ្រាប់​ឆ្លង​កាត់​៣​ប្រកួត ដោយ​បើក​ឆាក​ដំបូង​ស៊ុត​៣​គ្រាប់​ម្នាក់​ឯង​ទល់​ក្រុម​អេស្ប៉ាញ។ ស្ថិតិ​ក្រុម​ទាំង​ពីរ​នេះ ​អាច​និយាយ​បាន​ថា​ល្អ​ម្យ៉ាង​ម្នាក់​ប៉ុណ្ណោះ។

    ចំពោះ Diego Forlan ​ដែល​ជា​អតីត​កីឡាករ​ជម្រើស​ជាតិ​អ៊ុយរុយហ្គាយ ​លេង​បាន​១១២​ប្រកួត រក​បាន​៣៦​គ្រាប់​ដែរ​នោះ បាន​និយាយ​មុន​ការ​ប្រកួត​ខាង​លើ​ថា​៖ “Ronaldo ​គឺ​ជា​អ្នក​ដឹក​នាំ ​គ្រាប់​បាល់​របស់​គាត់ គឺ​បាន​បង្ហាញ​ច្បាស់​ថា​វា​សំខាន់​ប៉ុណ្ណា​សម្រាប់​ក្រុម។ គាត់​ជា​កីឡាករ​អស្ចារ្យ​ម្នាក់ ប៉ុន្តែ​ក្រុម​អ៊ុយរុយហ្គាយ​ក៏​មាន​ប្រព័ន្ធ​ការពារ​ល្អ​ដែរ។ ខ្ញុំ​មាន​ទំនុក​ចិត្ត​ថា​ប្រព័ន្ធ​ការពារ​របស់​អ៊ុយរុយហ្គាយ ​អាច​ទប់​ស្កាត់​ការ​ស៊ុត​របស់ Ronaldo ​បាន។ បើ​បិទ​គាត់​ជាប់ ​នោះ​យើង​បិទ​បាន​៥០​%​នៃ​ក្រុម​ព័រទុយហ្គាល់​ទាំង​មូល​ហើយ”៕ប្រភព៖ BBC

     

     

     

     

     

     

     

    ភ្ជាប់ទំនាក់ទំនងជាមួយ CTS SPORT