• គ្រូ​ជម្រើស​ជាតិ​ថៃ ​បារម្ភ​រឿង​វៀតណាម​តែង​លួច​មើល​ការ​ហ្វឹកហាត់​របស់​ខ្លួន​

    ក្រុម​វៀតណាម ​នឹង​បើក​កីឡដ្ឋាន​របស់​ខ្លួន​ស្វាគមន៍​ក្រុម​ភ្ញៀវ​ថៃ ​នៅ​ម៉ោង​៨​យប់​នេះ ​វគ្គ​ជម្រុះ​ពាន​រង្វាន់ FIFA World Cup 2022 ​ក្នុង​ពូល G ។

    ការ​ប្រកួត​នេះ​ដែរ នឹង​ស្វិតស្វាញ​ខ្លាំង ​ព្រោះ​ក្រុម​ទាំង​ពីរ​នេះ​កំពុង​ឈរ​នៅ​លេខ​១​និង​លេខ​២​ក្នុង​ពូល។ ប្រសិន​បើ​ថៃ​ឈ្នះ​វៀតណាម ​នោះ​ពួកគេ​នឹង​មាន​ឱកាស​ឡើង​ទៅ​ឈរ​នៅ​លេខ​១​កំពូល​តារាង​វិញ។ ដោយ​ឡែក​បើ​វៀតណាម​ឈ្នះ​វិញ ​នោះ​ពួកគេ​នឹង​ដាច់​ពិន្ទុ​កាន់​តែ​ច្រើន​ពី​​ក្រុម​លេខ​២​ក្នុង​ពូល​ហើយ។ ​ក្រុម​ទាំង​ពីរ​នេះ ​ប៉ះ​គ្នា​ម្ដង​រួច​ហើយ​កាល​ពី​បើក​ឆាក​នៅ​ទឹក​ដី​ថៃ ​ក្រោយ​គ្រា​នោះ​ពួកគេ​បញ្ចប់​ទៅ​លទ្ធផល​ស្មើ​គ្នា ០-០ ​ប៉ុណ្ណោះ។

    ​លោក ​Nishino ​គ្រូ​បង្វឹក​ក្រុម​ជម្រើស​ជាតិ​ថៃ ​បាន​បង្ហាញ​ក្ដី​បារម្ភ​មុន​ប្រកួត​ថា ​អាច​នឹង​មាន​អ្នក​មក​លួច​ថត​ការ​ហ្វឹកហាត់​និង​បច្ចេកទេស​លេង​របស់​ក្រុម​ថៃ។ ​ដូច្នេះ​ហើយ ​ការ​ហាត់​នៅ​ទឹក​ដី​វៀតណាម​នេះ ​លោក​បាន​ជួល​តារាង​ផ្សេង ​មិន​ហាត់​នៅ​តារាង​ដែល​ផ្ដល់​ឱ្យ​ដោយ​ភាគី​វៀតណាម​ឡើយ។ ការ​ធ្វើ​បែប​នេះ គឺ​ដោយសារ​តែ​គ្រូ​បង្វឹក​ជប៉ុន​នេះ ​មិន​ចង់​ឱ្យ​បែក​ធ្លាយ​ក្បួន​លេង​របស់​ខ្លួន ​មុន​ការ​ប្រកួត​ឡើយ។

    ជាក់​ស្ដែង​ការ​លេង​ទល់​ក្រុម​ម៉ាឡេស៊ី​កន្លង​ទៅ បើ​ទោះ​ជា​ភាគី​ថៃ​បាន​សុំ​កុំ​ឱ្យ​មាន​ការ​លួច​ថត​វីដេអូ​ហ្វឹកហាត់​យ៉ាង​ណា​ក្ដី ​ក៏​នៅ​តែ​មាន​អ្នក​មក​លួច​ថត ​និង​បង្ហោះ​តាម​ទូរទស្សន៍​ថែម​ទៀត​ផង៕ប្រភព៖ Bangkokpost


    ភ្ជាប់ទំនាក់ទំនងជាមួយ CTS SPORT