នៅការប្រកួតនាវគ្គជម្រុះ FIFA World Cup Qualifiers ឆ្នាំ ២០២២ នៅយប់មិញ ក្រុមនាគមាសវៀតណាមបានយកឈ្នះទៅលើអារ៉ាប់រួមនៅលទ្ធផល ១-០ ស្របពេលថៃបរាជ័យក្រោមថ្វីជើងម៉ាឡេស៊ី ២-១។
វៀតណាមធ្វើបានយ៉ាងល្អក្នុងការលេង ១១ ទល់ ១០ ក្រោយពេលដែលកីឡាករអារ៉ាប់ Khalifa Al Hammadi រងពិន័យកាតក្រហមនៅនាទី ៣៧។ លុះឈានដល់នាទី ៤៤ ក៏ Tien Linh បំបែកបាន ១ គ្រាប់នាំមុខដល់បិទការប្រកួត។
ចំណែកឯដំរីថៃត្បិតនាំមុខមុននៅនាទី ៧ ដោយ Chanathip Songkrasin ចុងក្រោយត្រូវម៉ាឡេស៊ីលុតពីរគ្រាប់វិញនៅនាទី ២៦ និង ៥៧។ នៅជុំទី ២ ក្នុងពូល G វៀតណាមកំពុងនាំមុខមាន ១០ ពិន្ទុខណៈថៃលេខ ២ អារ៉ាប់លេខ ៣ ម៉ាឡេស៊ីលេខ ៤ និងឥណ្ឌូណេស៊ីលេខ ៥ មាន ០ ពិន្ទុ៕