យុវជនឆ្នើម Ekanit របស់ក្រុមថៃ មានជំនឿចិត្តថាក្រុមរបស់ខ្លួននឹងយកឈ្នះលើក្រុមម៉ាឡេស៊ីបានក្នុងការប្រកួតជម្រុះ World Cup 2022 នាថ្ងៃស្អែកនេះ។
Ekanit Panya ជាខ្សែបម្រើកំពុងលេចធ្លោម្នាក់របស់ក្រុមថៃ ហើយក៏ជាអ្នករកគ្រាប់បាល់១គ្រាប់ជួយក្រុមឈ្នះអារ៉ាប់រួមកាលពីពេលកន្លងទៅនេះដែរ។ សម្រាប់ការប្រកួតទល់ក្រុមម៉ាឡេស៊ីនាពេលខាងមុខនេះ យុវជនវ័យ២០ឆ្នាំនេះមានសង្ឃឹមខ្ពស់ថានឹងធ្វើបានល្អថែមទៀត ដើម្បីជួយក្រុមយក៣ពិន្ទុ។
កីឡាករលេងនៅក្លឹបអាជីព Chiangrai United ខាងលើនេះបាននិយាយថា៖ “យើងដឹងថានៅ Bukit Jalil គឺជាកន្លែងពិបាក។ ម៉ាឡេស៊ី លេងខ្លាំងក្នុងដីរបស់ពួកគេ ព្រោះមានអ្នកគាំទ្រដ៏អស្ចារ្យ។ យើងត្រូវផ្ដោតលើការប្រកួតរបស់យើង លេងតាមគម្រោង ហើយនឹងធ្វើឱ្យល្អបំផុតដើម្បីយក៣ពិន្ទុ។ ខ្ញុំគិតថាយើងនឹងឡើងទៅជុំបន្ដ។ នៅពេលការប្រកួតដែលពិបាកៗទៀត ប៉ុន្តែមកដល់វគ្គនេះយើងមិនត្រូវមានកំហុសឡើយ យើងត្រូវប្រយ័ត្នបំផុត”។
ថៃកំពុងឈរកំពូលតារាងពូល G ដោយមាន៧ពិន្ទុឆ្លងកាត់៣ប្រកួត។ ពួកគេនឹងត្រូវប៉ះក្រុមម៉ាឡេស៊ីនាប្រកួតទី៤ នៅថ្ងៃស្អែក ហើយបន្ដទៅប៉ះក្រុមវៀតណាមទៀតនៅថ្ងៃទី១៩ខែនេះដែរ៕ប្រភព៖ Bangkokpost