ក្រុមបាល់ទាត់ជម្រើសជាតិអាល្លឺម៉ង់បានទៅដល់ស្រុកកំណើតវិញហើយ បន្ទាប់ពីធ្លាក់ត្រឹមវគ្គក្នុងពូលនៃពានរង្វាន់ FIFA World Cup 2018 នៅប្រទេសរុស្ស៊ី។
អាល្លឺម៉ង់ ឆ្លងកាត់៣ប្រកួត ឈ្នះបានតែ១ប្រកួតប៉ុណ្ណោះ ហើយ១ប្រកួតនោះគឺស៊ីដោយបាល់ទាត់ហ្វ្រីឃីកនាចុងម៉ោងថែមទៀតទល់ក្រុមស៊ុយអែត ដោយកីឡាករ Toni Kroos ។ ខណៈដែលប្រកួតចុងក្រោយ ប៉ះកូរ៉េខាងត្បូង ពួកគេមិនអាចធ្វើអ្វីក្រុមអាស៊ីនេះបាន ហើយថែមទាំងត្រូវកូរ៉េស៊ីបាន២គ្រាប់វិញថែមទៀត ទើបបណ្ដាលឱ្យធ្លាក់តែម្ដង។
Kroos ខ្សែបម្រើឆ្នើមនិងលេងល្អនៅអាល្លឺម៉ង់បាននិយាយប្រាប់អ្នកកាសែតថា៖ “យើងធ្វើមិនបានល្អទាល់តែសោះ។ កីឡាករហាក់ដូចជាលេងមិនអស់សមត្ថភាព។ ប្រសិនបើយើងលេង៩០នាទី ហើយមិនអាចស៊ុតក្រុមកូរ៉េខាងត្បូងបាន នោះការធ្លាក់នេះ គឺពិតជាសមបំផុតហើយ។ យើងបានទទួលអ្វីដែលយើងគួរទទួល។ ខ្ញុំគ្មានអ្វីត្រូវនិយាយទៀតទេ”។
ការធ្លាក់ត្រឹមវគ្គក្នុងពូលនេះ គឺជាការធ្លាក់លើកដំបូងហើយសម្រាប់ក្រុមជម្រើសជាតិអាល្លឺម៉ង់ចាប់តាំងពីឆ្នាំ១៩៣៨មក ពោលគឺរយៈពេល៨០ឆ្នាំហើយ៕ប្រភព៖ DailyMail
