ក្លឹប Arsenal បានប្រកាសថានឹងបន្ដគាំទ្រលោក Emery ទៀត ប៉ុន្តែក៏ចង់ឃើញក្រុមកាំភ្លើងធំបង្ហាញទម្រង់លេងល្អជាងនេះផងដែរ។
Arsenal ឈ្នះតែ២ប្រកួតប៉ុណ្ណោះក្នុងការលេង១០ប្រកួតចុងក្រោយនៅ Premier League ហើយនៅ៨ពិន្ទុឆ្ងាយពីតំបន់កាត់ចោល។ ការបង្ហាញទម្រង់លេងមិនល្អនេះហើយ ទើបបានជាកៅអីរបស់លោក Emery ក្ដៅខ្លាំង អមជាមួយអ្នកគាំទ្រក៏ចង់ឱ្យក្លឹបបណ្ដេញអ្នកចាត់ការនេះចេញដែរ។ តែបើតាមការប្រកាសរបស់ក្លឹបផ្ទាល់ គឺពួកគេនៅតែជឿទុកចិត្តថា Emery នឹងនៅតែល្អ ហើយជាបុគ្គលសក្ដិសមបំផុត ដើម្បីដឹកនាំក្រុម។
អ្វីដែលក្លឹបចង់បាន គឺចង់ឃើញកីឡាករទាំងអស់ធ្វើការជាមួយគ្នា ដើម្បីពង្រឹងសមត្ថភាពឱ្យបានល្អជាងនេះ។ ដោយឡែកសម្រាប់លោក Emery ក៏បាននិយាយដែរថា លោកនៅតែមានទំនុកចិត្តលើកូនក្រុម ថានឹងធ្វើបានល្អសម្រាប់ប្រកួតបន្ទាប់។ ការរិះគន់របស់អ្នកគាំទ្រ នឹងធ្វើឱ្យក្រុមលេងកាន់តែល្អមួយកម្រិតទៀត៕ប្រភព៖ Dailymail
