អ្នកចាំទី Alisson Becker បានបង្ហាញពីអារម្មណ៍មិនសប្បាយចិត្ត ជុំវិញការដែលក្រុមហង្សក្រហមត្រូវបង្ខំចិត្តបែងចែកជាពីរក្រុមដើម្បីបំពេញការប្រកួតផ្ទួនៗគ្នាក្នុងចន្លោះពេល ២៤ ម៉ោង។
នៅថ្ងៃទី ១៧ ធ្នូ ឆ្នាំ ២០១៩ ក្រុម Liverpool នឹងត្រូវប៉ះ Aston Villa នៅ Carabao Cup ដែលមុនមួយថ្ងៃនៃការលេងវគ្គពាក់កណ្តាលផ្តាច់ព្រ័ត្រក្នុងប្រទេសកាតា នៃពាន Club World Cup។ ដំណោះស្រាយសមប្រកប Klopp បានប្រកាសហើយថានឹងបែងចែកចេញជាពីរក្រុមដើម្បីលេងបានទាំងពីរប្រកួត។
យ៉ាងណាមិញអ្នកចាំទី Alisson បាននិយាយក្រោយយកឈ្នះ Genk ២-១ ថា៖ “គ្មាននរណាចូលចិត្តការប្រកួតបែបនេះទេ ព្រោះវាពិតជាលំបាកបំផុត ស្របពេលដែល Klopp គាត់បាននិយាយហើយថាយើងនឹងលេងពីរក្រុមផ្សេងគ្នា តែនេះវានឹងមិនសមប្រកបសម្រាប់យើងទាល់តែសោះ”។
លោកបន្ត៖ “ដោយយើងចង់ផ្តល់ភាពល្អបំផុតក្នុងការប្រកួត ហើយវាក៏នឹងលេចចេញពេលយើងមានកាលវិភាគលេងស្រួលបួល តែអ្វីដែលយើងមានគឺផ្សេងគ្នា”៕ ប្រភព៖ Metro
