ប្រធានក្លឹប Monaco លោក Vadim Vasilyev បានទម្លាយជុំវិញការសន្ទនារបស់ខ្លួននិងអតីតកីឡាករ Kylian Mbappe ទាក់ទិននឹងអនាគតក្នុងការចូលរួមជាមួយក្លឹបថ្មី។
Mbappe ដែលចាកចេញពី Monaco ទៅចូលរួមនៅ PSG នាឆ្នាំ ២០១៨ សព្វថ្ងៃកំពុងជាប់ចចាមអារ៉ាមថាអាចនឹងផ្លាស់ទៅក្លឹប Real Madrid។ ឆ្លើយតបរឿងរ៉ាវនេះលោក Vasilyev ក៏មានការទទួលស្គាល់ ហើយលម្អិតថាទ្រនំស្តេចស Madrid គឺពិតជាគោលដៅបន្ទាប់របស់ Mbappe គ្រាន់តែត្រូវការពេលវេលា។
លោកប្រាប់សារព័ត៌មាន Telefoot ថា៖ “Mbappe គេប្រាប់ខ្ញុំពីបំណងផ្លាស់ទៅចូលរួមនៅ Real Madrid ដោយគ្រាន់តែថាពេលនោះវាលឿនពេក ហើយណាមួយចង់បង្កើតប្រវត្តិសាស្រ្តនៅក្លឹបក្នុងប្រទេសកំណើត [បារាំង] សិន”។
លោកសង្កត់ធ្ងន់៖ “អ៊ីចឹង Real Madrid អាចរង់ចាំ Mbappe បន្តិចទៀតសិនបាន”។ គួរបញ្ជាក់ថាកុងត្រារបស់យុវជនតម្លៃ ១៧០ លានអឺរ៉ូរូបនេះជាប់សេសសល់ជាមួយក្លឹបបារាំងដល់ឆ្នាំ ២០២២ ឯណោះ៕ ប្រភព៖ Football-Espana