ក្រុមបាល់ទាត់ជម្រើសជាតិជប៉ុន នឹងត្រូវតតាំងជាមួយក្រុមប៉ូឡូញនៅម៉ោង៩យប់នេះ ដើម្បីកាត់ក្ដីថាពួកគេអាចឡើងទៅវគ្គបន្ដ ឬធ្លាក់ត្រឹមវគ្គក្នុងពូលនេះ។
ក្នុងការប៉ះប៉ូឡូញយប់នេះ ជប៉ុនមិនបាច់ចាំតែឈ្នះទើបអាចឡើងទៅវគ្គ១៦ក្រុមចុងក្រោយនោះទេ ពោលគឺបានត្រឹមស្មើ យក១ពិន្ទុ ក៏អាចឡើងទៅវគ្គបន្ដបានដែរ។ បើទោះជាយ៉ាងនេះក្ដី Makoto Hasebe ប្រធានក្រុមជម្រើសជាតិជប៉ុន ចង់បាន៣ពិន្ទុពេញតែម្ដងនៅយប់នេះ មិនមែនត្រឹមលទ្ធផលយកស្មើ ហើយឡើងទៅវគ្កបន្ដឡើយ។
“ខ្ញុំមិនគិតថាយើងចូលប្រកួត ដើម្បីយកស្មើហើយឡើងទៅវគ្គបន្ដទេ។ យប់នេះជាយប់កាត់សេចក្ដី ក្នុងការប្រកួតក្នុងពូល យើងមិនទាន់ប្រាកដថាយើងបានឡើងឡើយ ដូច្នេះលទ្ធផលឈ្នះ ល្អបំផុត មិនមែនយកស្មើនោះទេ។ ជប៉ុន មានបំណងឈរនៅកំពូលតារាងក្នុងពូលនេះ”។ សម្ដីរបស់ប្រធានក្រុមជប៉ុន។
ឆ្លងកាត់២ប្រកួតកន្លងមក ជប៉ុនបានយកឈ្នះកូឡុំប៊ី ២-១ និងស្មើក្រុមសេណេហ្គាល់ ២-២។ លទ្ធផលបាន៤ពិន្ទុនេះ បានធ្វើឱ្យពួកគេឈរនៅកំពូលតារាងពូល H នេះ ដោយត្រូវប្រកួតចុងក្រោយជាមួយប៉ូឡូញ។ បើឈ្នះនឹងបន្ដឈរកំពូលតារាង ហើយបើស្មើក៏អាចឡើងទៅវគ្គបន្ដបានដែរ៕ប្រភព៖