លោក Solskjaer អ្នកចាត់ការក្រុម Manchester United បាននិយាយថា Martial ត្រូវពង្រឹងសមត្ថភាពបន្ថែមទៀត ដើម្បីរក្សាកៅអីជម្រើស១១នាក់ដំបូង និងជួយក្រុមរកគ្រាប់បាល់។
Martial បានខកខានប្រកួតជាច្រើនខែ ដោយសារតែមានបញ្ហារបួស។ ដោយឡែកការត្រលប់មកវិញជាថ្មីនេះ បានធ្វើឱ្យរូបគេមានទម្រង់លេងល្អ និងប្លែកខ្លាំង។ ជាក់ស្ដែងនៅ២ប្រកួតចុងក្រោយដែលមានឱកាសបានលេងជាប់នេះ គឺរកបាន២គ្រាប់ផងដែរ។ ការធ្វើបានល្អនេះហើយ ទើបលោក Solskjaer ជឿជាក់ថាកីឡាករបារាំងនេះ នឹងជួយក្រុមបានច្រើនជាក់ជាមិនខាននាពេលខាងមុខ។
អ្នកចាត់ការទើបកាន់ក្លឹប Man Utd និងកំពុងក្ដៅកៅអីនេះ បាននិយាយថា៖ “ក្នុងនាមជាកីឡាករពាក់អាវលេខ៩ អ្នកមិនអាចបម្រុងបានទេ។ តួនាទីត្រូវរកគ្រាប់បាល់ឱ្យក្រុមច្រើនតាមដែលអាចធ្វើបាន។ ខ្ញុំជឿជាក់លើគាត់ យើងនឹងឃើញពីភាពលេចធ្លោរបស់គាត់នៅប៉ុន្មានឆ្នាំខាងមុខនេះ”។
រំលឹកថាក្រុម Man Utd នឹងត្រូវប៉ះក្រុម AFC Bournemouth នៅម៉ោង៧:៣០នាទីល្ងាចនេះ ក្នុងការប្រកួតលីគកំពូលអង់គ្លេស សប្ដាហ៍ទី១១៕ប្រភព៖ Dailymail