បែក​ធ្លាយ ​គ្រូ​បង្វឹក​អាហ្សង់ទីន ​ចង់​ដូរ​កីឡាករ ​ទាល់​តែ​សួរ Messi ​សិន

អាហ្សង់ទីន ​បាន​ឡើង​ទៅ​វគ្គ​បន្ត​ហើយ ​បន្ទាប់​ពី​បាន​យក​ឈ្នះ​លើ​ក្រុម​នីហ្សេរីយ៉ា ​២-១ ​នា​ការ​ប្រកួត​ម្សិលមិញ​នេះ។

ក្នុង​ការ​ប្រកួត​នេះ ​គេ​សង្កេត​ឃើញ​ថា Lionel Messi ​បាន​ដើរ​តួ​យ៉ាង​សំខាន់​ក្នុង​នាម​ជា​ប្រធាន​ក្រុម។ អ្វី​ដែល​ពិសេស​ទៀត​នោះ ​គេ​សង្កេត​ឃើញ​ថា ​កីឡាករ​ទាំង​អស់​បាន​ស្ដាប់​សម្ដី​របស់ Messi ​ខ្លាំង​ណាស់។ លើស​ពី​នេះ​ទៅ​ទៀត ​សូម្បី​តែ​លោក Jorge Sampaoli ​ពេល​ចង់​ដូរ​កីឡាករ ក៏​ត្រូវ​ទៅ​សួរ​នាំ Messi ​នៅ​ក្នុង​តារាង​សិន​ដែរ។

ក្នុង​វីដេអូ​មួយ ​បាន​បង្ហាញ​យ៉ាង​ច្បាស់​ថា​លោក Jorge Sampaoli ​បាន​ទៅ​សួរ​យោបល់​ពី Messi ​ដើម្បី​ផ្លាស់​ប្ដូរ Aguero ​ឱ្យ​ចូល​លេង ​អំឡុង​ពេល​ក្រុម​នីហ្សេរីយ៉ា ​រក​គ្រាប់​បាល់​បាន​ស្មើ​វិញ​នោះ។ យ៉ាង​ណាមិញ ​ក្រោយ​ពី​ទៅ​សួរ​ហើយ ​គ្រូ​បង្វឹក​រូប​នេះ​ក៏​បាន​ផ្លាស់ប្ដូរ​កីឡាករ​បាន​មែន។

ក្រោយ​ពី​ចប់​ការ​ប្រកួត ​និង​បាន​ឡើង​វគ្គ​១៦​ក្រុម​ចុង​ក្រោយ​ហើយ ​លោក Sampaoli ​បាន​និយាយ​ថា​ខ្លួន​សប្បាយ​ចិត្ត​ណាស់ ​នៅ​ពេល​ដែល​ចប់​ការ​ប្រកួត ហើយ Messi ​បាន​មក​អោប។ ​នេះ​ជា​សញ្ញា​មួយ​ដែល​បញ្ជាក់​ថា ​ខ្សែ​ប្រយុទ្ធ​អាវ​លេខ​១០​នេះ ពិត​ជា​យល់​ពី​អារម្មណ៍​របស់​លោក​ពិត​មែន៕ប្រភព៖ DailyMail

ភ្ជាប់ទំនាក់ទំនងជាមួយ CTS SPORT