នៅបទសម្ភាសន៍ជាមួយសារព័ត៌មាន France Football កាលពីពេលថ្មីៗនេះ Cristiano Ronaldo បានបន្តនិយាយដល់រឿងរ៉ាវរវាងខ្លួននិង Lionel Messi ដោយសង្កត់ធ្ងន់ថាការដែលអាចលេងរួមលីគជាមួយគ្នា នោះគឺជាការប្រកួតប្រជែងដ៏ល្អបំផុតមួយ។
សព្វថ្ងៃអ្នកទាំងពីរមួយនៅអេស្ប៉ាញ មួយនៅអ៊ីតាលី មានភាគរយអាចជួបគ្នាតែក្នុងការប្រកួតនៅពានរង្វាន់អឺរ៉ុបប៉ុណ្ណោះ។ ថ្លែងប្រាប់សារព័ត៌មានខាងលើ CR7 និយាយថា៖ “មនុស្សជាច្រើនបាននិយាយអំពីការដែលយើងទាំងពីរបានបំពេញគ្នាទៅវិញទៅមក ជាពិសេសគឺពេលនៅអេស្ប៉ាញដែលធ្វើឲ្យយើងមានភាពល្អប្រសើរឡើង”។
លោកបន្ត៖ “វាជាការពិតខ្ញុំចាប់អារម្មណ៍វត្តមានរបស់គាត់ពេលលេងនៅ Madrid ច្រើនជាងពេលខ្ញុំលេងនៅ Manchester ដោយយើងសុទ្ធសឹងជាអត្តសញ្ញាណតំណាងឲ្យក្លឹបរបស់យើងផ្ទាល់ ដោយខ្ញុំក៏រីករាយប្រសិនលឺគេនិយាយថាខ្ញុំជាកីឡាករល្អនិងអស្ចារ្យបំផុតមួយរូប”។
លោកសង្កត់ធ្ងន់៖ “ខ្ញុំលឺគ្រប់យ៉ាងគេនិយាយអំពីខ្ញុំនៅពេលបច្ចុប្បន្ននេះ (ទាំងល្អនិងអាក្រក់) ប៉ុន្តែគ្រប់យ៉ាងវាក៏នឹងត្រូវចប់សព្វគ្រប់ទាំងអស់ នៅទីបញ្ចប់នៃអាជីពបាល់ទាត់ ហើយខ្ញុំនឹងលែងខ្វល់អ្វីទាំងអស់ ហើយក៏នឹងដកខ្លួនពីគ្រប់យ៉ាងផងដែរ”៕ ប្រភព៖ Goal