អនាគតរបស់ Gareth Bale នៅតែមិនទាន់អាចឆ្លើយចេញ ក្រោយពេលការខកខាននៅលើទីលានប្រកួតចេះតែបន្កកើតមានឥតឈប់ បូកផ្សំនឹងភាពរកាំរកូសរវាងគ្រូបង្វឹកលោក Zinedine Zidane ដែលមិនអាចដោះស្រាយរួចរាល់ផងនោះ។
៦ រដូវកាលរបស់ Bale នៅ Real Madrid គឺមានតែ ៥៣ ភាគរយប៉ុណ្ណោះដែល Bale បានចូលរួមការប្រកួត សេសសល់ប៉ុន្មានគឺខ្សែប្រយុទ្ធសញ្ជាតិវែលខកខានដោយសារបញ្ហារបួសទាំងអស់។ បច្ចុប្បន្នពុំមានក្លឹបនៅអឺរ៉ុបណាមួយ ដែលហ៊ានឲ្យថ្លៃពលកម្ម Bale ដល់ទៅ ១៧ លានអឺរ៉ូ/ឆ្នាំ (កាត់ថ្លៃពន្ធ) ដើម្បីទាញឲ្យគេមកចូលរួមនោះទេ ព្រោះដោយសារកំណត់ត្រារបួសដែលពិបាកនឹងព្យាករណ៍មួយនេះ។
ផ្ទុយទៅវិញមានតែក្លឹបនៅប្រទេសមួយគត់ ដូចជា Shanghai Shenhua ដែលស្ថិតក្នុងការចរចារវាងភ្នាក់ងាររបស់ខ្សែប្រយុទ្ធ Real Madrid ហើយហ៊ានចំណាយដល់ទៅ ២៥ លានអឺរ៉ូ/ឆ្នាំ លើថ្លៃពលកម្ម ដោយនេះកាត់កងថ្លៃពន្ធរួចរាល់ថែមទៀត។
ចំពោះបញ្ហាដែលជាមន្ទិលគឺទាក់ទិននឹងតម្លៃខ្លួនដែល Real Madrid បានស្នើពីក្លឹបចិន រហូតដល់ទៅ ៣០-៤០ លានអឺរ៉ូលើការដោះដូរសម្រាប់ Bale តែ Shenhua នឹងពិបាកចាយខ្លាំងបំផុត ព្រោះដោយសារច្បាប់បាល់ទាត់របស់ប្រទេសចិន៕
ប្រភព៖ Marca