សឹងគ្រប់ការប្រកួតទាំងអស់មិនថានៅជម្រើសជាតិនិងការលេងឲ្យក្លឹប គឺរមែងមានវត្តមាន Cristiano Ronaldo នៅជម្រើស ១១ នាក់ដំបូងទាំងអស់។ យ៉ាងណាមិញក្រោយឆ្លងកាត់ការប្រកួតជាប់ៗគ្នានៅចន្លោះពេលជិត ១ ខែមកនេះ អ្នកចាត់ការលោក Maurizio Sarri បាននឹងកំពុងត្រៀមដាក់ឲ្យ CR7 មានពេលវេលាសម្រាកខ្លះហើយ។
ពោលគឺអាចនឹងជាការប្រកួតទល់ Lecce នៅចុងសប្តាហ៍នេះ ឬប៉ះ Genoa នៅពាក់កណ្តាលសប្តាហ៍ក្រោយ គឺនឹងគ្មានវត្តមាន Cristiano Ronaldo នោះទេ ដរាបណាវិលមកដល់ប្រកួតសំខាន់ពេលប៉ះ Torino, Lokomotiv និង AC Milan ទើបអាចឃើញវត្តមានតារាឆ្នើមរូបនេះត្រលប់មកវិញ។
នៅ ២៤ ថ្ងៃកន្លងទៅ Ronaldo ឆ្លងកាត់ការលេង ៧ ប្រកួតជាប់គ្នា បែបនេះលោក Sarri មានបំណងនឹងផ្តល់ពេលវេលាសម្រាកសមស្របមួយសម្រាប់លោក មុនឈានដល់ជំនួប Derby ទល់ Torino នៅថ្ងៃទី ២ សឹមដាក់កីឡាករព័រទុយហ្គាល់ឲ្យត្រលប់មកវិញ។
ប្រភពពី IIBianconeri.com បានសង្កត់ធ្ងន់ថាចំណាត់ការរបស់ Sarri គឺមិនចង់ឲ្យមានការពឹងផ្អែកតែលើ Ronaldo ម្នាក់ខ្លាំងពេក ដោយខ្សែប្រយុទ្ធជួរមុខមាន Dybala និង Higuain ក៏ដូចជា Bernardesci ក៏ត្រៀមរួចរាល់សម្រាប់ការលេងទល់ Lecce ពេលខាងមុខផងដែរ៕ ប្រភព៖ AF
