មួយរយៈចុងក្រោយនេះ ក្រុម Atletico Madrid ធ្វើមិនបានល្អឡើយ រហូតធ្វើឱ្យអ្នកគាំទ្រមិនពេញចិត្តចំពោះការដឹកនាំរបស់លោក Simeone ឡើយ។
ជាមួយការរិះគន់នេះដែរ អ្នកចាត់ការស៊ីថ្លៃជាងគេនេះ បានឆ្លើយតបថាលោកគោរពជានិច្ចចំពោះការផ្ដល់យោបល់របស់អ្នកគាំទ្រ។ ការរិះគន់គឺជាមធ្យោបាយមួយដែលធ្វើឱ្យក្រុមដឹងថាខ្លួនខុសអ្វី និងអាចរកវិធីដោះស្រាយវាបាន។ Simeone បន្ដថាក្រុម AT Madrid តែងតែព្យាយាមជានិច្ច ប្រឹងប្រែងជានិច្ច បើទោះជាស្ថិតក្នុងពេលណាក៏ដោយ។
ចំពោះការរកគ្រាប់បាល់មិនបាន អ្នកចាត់ការសញ្ជាតិអាហ្សង់ទីននេះ បានលើកឡើងថាក្រុមទាំងមូលព្យាយាមជានិច្ចក្នុងការស្វែងរកគ្រាប់បាល់ ហើយក៏បង្កើតឱកាសច្រើនដែរ។ គ្រប់ប្រកួតទាំងអស់ការចាប់ផ្ដើមលេងក្រុមតែងតែធ្វើបានល្អ ប៉ុន្តែចូលដល់តង់ទី២វិញ តែងតែភ្លាត់ជានិច្ច។
តាំងពីខែកញ្ញាមក ក្រុម AT Madrid មិនទាន់ស្គាល់ពាក្យឈ្នះទេ ក្នុងការលេងក្នុងដីខ្លួនឯង។ កត្តានេះហើយទើបធ្វើឱ្យអ្នកគាំទ្រមិនសប្បាយចិត្តឡើយ។ នៅរាត្រីនេះ ពួកគេនឹងលេងក្នុងដីខ្លួនឯងទៀតទល់ក្រុម Bayer Leverkusen ពានរង្វាន់ UEFA Champions League ៕ប្រភព៖ Marca