Ole Gunnar Solskjaer ថាក្រុមបិសាចក្រហម Manchester United នឹងត្រលប់មកប្រជែងយកពាន Premier League វិញ មិនចំណាយពេលដល់៣០ឆ្នាំនោះឡើយ។អ្នកចាត់ការក្រុមបិសាចក្រហមនេះ ហាក់និយាយដៀមដាមដល់ក្រុម Liverpool ដែលខកខានឈ្នះពានរង្វាន់លីគកំពូលអង់គ្លេសជាច្រើនឆ្នាំមកហើយ។ ស្របពេលបិសាចក្រហមនេះ នឹងបើកកីឡដ្ឋានរបស់ខ្លួនស្វាគមន៍ក្រុមភ្ញៀវ Liverpool នៅយប់នេះហើយ។ ការប្រកួតនេះពិតជាសំខាន់ណាស់សម្រាប់ក្រុម Man Utd ដែលកំពុងស្ថិតនៅក្បែរតំបន់កាត់ចោលទៅហើយ។ មួយវិញទៀត ប្រសិនបើក្រុម Liverpool ឈ្នះ នោះតំណែងរបស់លោក Ole នេះ ក៏អាចនឹងបាត់បង់ក៏ថាបាន ព្រោះថាពេលនេះមានអ្នកគាំទ្រជាច្រើនចាប់ផ្ដើមមិនពេញចិត្តជាមួយការដឹកនាំរបស់លោកទៅហើយ។
លោក Ole បាននិយាយថា៖ “ខ្ញុំច្បាស់ណាស់យើងនឹងត្រលប់មកល្អវិញ មិនប្រើពេល៣០ឆ្នាំទេ។ ខ្ញុំមិនដែលគិតថាចង់បានលទ្ធផលស្មើនោះទេ ខ្ញុំតែងតែចង់បាន៣ពិន្ទុជានិច្ច។ យើងត្រូវការឈ្នះ។ វាមិនមែនជាបញ្ហាទេ បើអ្នកលេងទល់ក្រុម Liverpool , Man City ឬ Brighton នោះ។ ការលេងល្អ និងលទ្ធផលសុទ្ធតែអាចកែប្រែបាន”៕
ប្រភព៖ DailyMail