មុននេះបន្តិចក្លឹប Borussia Dortmund ទើបតែទទួលបានជោគជ័យលើការចុះហត្ថលេខាបន្តកុងត្រាថ្មីជាមួយកីឡាករ Raphael Guerreiro រហូតដល់ឆ្នាំ ២០២៣។
កីឡាកររូបនេះបានផ្លាស់ចេញពី FC Lorient មកចូលរួមនៅ BVB នារដូវក្តៅឆ្នាំ ២០១៦ ហើយមកទល់ពេលនេះបង្ហាញខ្លួនបាន ៦១ លើករកបាន ១០ គ្រាប់ គ្រាដែលកុងត្រាចាស់ត្រូវផុតឆ្នាំក្រោយ តែបន្តថ្មីឡើង ៣ ឆ្នាំបន្ថែមទៀត។
ថ្លែងប្រាប់ជាផ្លូវការ Guerreiro និយាយថា៖ “Dortmund ជាក្លឹបល្អមួយដែលខ្ញុំមានអារម្មណ៍ថាកក់ក្តៅដូចជាគ្រួសារតែមួយអស់រយៈពេល ៣ ឆ្នាំមកនេះ ហើយខ្ញុំនឹងធ្វើគ្រប់យ៉ាងដើម្បីជួយក្រុមសម្រេចនូវគោលដៅរបស់ពួកគេ”។
រំឭកដែរថាកាលពីអំឡុងខែមិថុនា ឆ្នាំ ២០១៩ មុនទីផ្សារដោះដូររដូវក្តៅបើកទ្វារ Guerreiro ក៏ធ្លាប់រងចចាមអារ៉ាមថា Barcelona ចង់បានផងដែរ ប៉ុន្តែក្រោយមកក៏ស្ងាត់ទៅវិញ៕ ប្រភព៖ AF