អតីតខ្សែប្រយុទ្ធនៅហង្សក្រហមលោក Robbie Fowler បានទម្លាយពីសម្រង់សម្តីចាស់រវាងខ្លួននិងលោក Jurgen Klopp ជុំវិញមូលហេតុ ដែលអ្នកចាត់ការសញ្ជាតិអាល្លឺម៉ង់រូបនេះបដិសេធសំណើក្លឹបយក្ស ២ មាន Manchester United និង Real Madrid កាលពីប៉ុន្មានឆ្នាំមុន។
លោក Klopp ក្រោយចាកចេញពី Dortmund បានមកចាប់ទ្រនំថ្មីនៅទីក្រុងMerseyside ជាមួយ Liverpool ហើយការដឹកនាំរបស់លោកក៏ផ្លាស់ប្តូរឲ្យក្លឹបដែលខកខានឈ្នះពានជាច្រើនឆ្នាំ វិលមកក្លាយជាក្លឹបកំពូលមួយនៅអឺរ៉ុប។
ថ្លែងបញ្ជាក់ប្រាប់ Mirror លោក Fowler ទម្លាយថា៖ “ខ្ញុំធ្លាប់សម្ភាសន៍ជាមួយ Klopp កាលពីប៉ុន្មានឆ្នាំមុនហើយគាត់បដិសេធសំណើក្លឹបអ្នកមានដូចជា Man Utd និង Real Madrid ក៏ដោយសារគាត់មិនចូលចិត្តក្លឹបដែលគិតតែពីការធ្វើជំនួញពេក”។
លោកបន្ត៖ “Klopp គាត់និយាយថាចូលចិត្ត Liverpool ព្រោះមានតុល្យភាពនៃការប្រើប្រាស់លុយដើម្បីឈោងដល់ចំណុចកំពូល ហើយដើម្បីបង្កើតអត្តសញ្ញាណរបស់ក្លឹបនិងសម្រាប់អ្នកគាំទ្ររបស់ពួកគេ”។
រំឭកថា Klopp ក៏ធ្លាប់ដឹកនាំ ឲ្យ Dortmund ឈ្នះ Bundesliga ពីរសម័យកាល ក៏ដូចជា DFB-Pokal ហើយបរាជ័យក្រោមថ្វីជើង Bayern Munich នៅវគ្គផ្តាច់ព្រ័ត្រ UCL ឆ្នាំ ២០១៣៕ ប្រភព៖ Marca