១គ្រាប់របស់ Gareth Bale កាលពីយប់មិញនេះ បានបន្ដក្ដីសង្ឃឹមឱ្យក្រុមជម្រើសជាតិវែលក្នុងវគ្គជម្រុះតាមពូលពានរង្វាន់ Euro 2020 នៅឆ្នាំក្រោយនេះ។
កាលពីយប់មិញនេះ ក្រុមជម្រើសជាតិវែលយកបាន១ពិន្ទុពីក្រុមក្រូអាត ក្រោយពីស្មើគ្នា ១-១ ។ លទ្ធផលនេះ បានធ្វើឱ្យក្រុមវែលនៅមានសង្ឃឹមឡើងទៅវគ្គបន្ដបាន ដោយបច្ចុប្បន្ននេះពួកគេនៅចំណាត់ថ្នាក់លេខ៤មាន៨ពិន្ទុឆ្លងកាត់៦ប្រកួត។ ដោយសល់២ប្រកួតទៀតក្នុងដៃ ហើយក្រុមក្រូអាតនៅលេខ១មាន១៤ពិន្ទុ សល់១ប្រកួត និងហុងគ្រីលេខ២មាន១២ពិន្ទុសល់១ប្រកួត និងស្លូវ៉ាគី មាន១០ពិន្ទុសល់២ប្រកួតទៀតដែរ នោះវែលដែលនៅលេខ៤សល់២ប្រកួតទៀត ក៏នៅមានសង្ឃឹមឡើងទៅវគ្គបន្ដបានដែរ។
២ប្រកួតដែលនៅសល់របស់វែល នឹងត្រូវប៉ះក្រុមអាហ្សេបៃហ្សង់នៅថ្ងៃទី ១៧ខែក្រោយ និងក្រុមហុងគ្រីនៅថ្ងៃទី២០ខែក្រោយ។ ប្រសិនបើវែល អាចយកឈ្នះហុងគ្រីបាន ហើយពួកគេមានពិន្ទុស្មើក្រុមស្លូវ៉ាគី នោះវែលជាអ្នកឡើងទៅវគ្គបន្ដ ព្រោះពួកគេមានតែម Head-to-Head ជាង៕ប្រភព៖ Bbc
