អតីតអ្នកចាត់ការក្លឹបកាំភ្លើងធំ Arsenal លោក Arsene Wenger បានបង្ហាញការយល់ឃើញថាចំណូលថ្មី Eden Hazard ពុំមែនជាបេក្ខភាពសក្តិសមក្នុងជំនួសតំណែង Cristiano Ronaldo នៅក្លឹប Real Madrid នោះទេ។
កីឡាករបែលហ្សិកហាក់ចាប់ផ្តើមដោយតានតឹងបំផុតនារដូវកាល ២០១៩/២០ ដោយទើបបំបែកបានមួយគ្រាប់ប៉ុណ្ណោះឲ្យក្លឹប Real Madrid។ ប្រាប់ beIN Sports លោក Wenger និយាយថា៖ “Hazard ពុំមែនជាអ្នកជំនួស Ronaldo នោះទេ ដោយគេមិនអាចរកបាន ៥០ គ្រាប់ក្នុងមួយឆ្នាំបានឡើយ”។
លោកបន្ត៖ “ក្លឹបត្រូវការអ្នកសម្រេចគ្រាប់បាល់ផ្សេងទៀត ព្រោះ Benzema ពេលនេះក៏មានវ័យ ៣២ ឆ្នាំហើយ ប្រសិនពួកគេមានយុវជនណាម្នាក់ផ្សេងទៀតនោះ ប្រហែលជាអាចធ្វើបានកាន់តែល្អជាងនេះ”។
“Eden Hazard គឺជាកីឡាករដ៏អស្ចារ្យមួយរូបដែលតែងតែបង្កើតឱកាស និងពេលខ្លះក៏ជាអ្នកសម្រេចទីពេលដែលគាត់ត្រូវធ្វើក្នុងការប្រកួតធំៗ ប៉ុន្តែខ្ញុំគិតថា Real មិនទាន់ឃើញពី Hazard ពិតប្រាកដទេ ពោលគឺគាត់មិនទាន់ស្ថិតក្នុងកម្រិតកំពូលរបស់គាត់ឡើយ”៕
ប្រភព៖ Marca