ក្រុមបាល់ទាត់ជម្រើសជាតិអាល្លឺម៉ង់ បាននាំមុខក្រុមអាហ្សង់ទីន ២គ្រាប់ទៅហើយនៅតង់ទី១ ប៉ុន្តែចុងក្រោយបែរជាភ្លាត់ឱ្យធ្លាយ២គ្រាប់វិញទៅវិញ ក្នុងប្រកួតមិត្តភាពយប់មិញ។
Gnabry ជាអ្នកនាំមុខឱ្យក្រុមជម្រើសជាតិអាល្លឺម៉ង់ក្នុងការប្រកួតខាងលើនេះ ដោយរកបានគ្រាប់បាល់តាំងពីនាទី១៥ដើមតង់។ រហូតមកដល់នាទី២២ Havertz ក៏បានបន្ថែមគ្រាប់បាល់ទី២ទៀត ដែលធ្វើឱ្យត្រឹម១តង់ទី១ ក្រុមអាល្លឺម៉ង់នាំមុខ២គ្រាប់ទៅហើយ។ តែចូលដល់តង់ទី២វិញ អ្វីគ្រប់យ៉ាងមិនដូចការគិតឡើយ ក្រុមអាល្លឺម៉ង់មិនអាចធ្វើអ្វីអាហ្សង់ទីនបាន ហើយផ្ទុយទៅវិញ ត្រូវរបូតគ្រាប់បាល់២គ្រាប់ថែមទៀត ដោយ Alario នៅនាទី៦៦ និង Ocampos នៅនាទី៨៥។
ចប់ការប្រកួតក្រុមខ្លាំងទាំងពីរបានត្រឹមស្មើគ្នា ២-២ ប៉ុណ្ណោះក្នុងការប្រកួតមិត្តភាពមួយនេះ។ អាល្លឺម៉ង់ប្រកួតបន្ទាប់នឹងប៉ះក្រុមអីស្តូនី នៅថ្ងៃទី១៤ វគ្គជម្រុះ Euro 2020 ស្របពេលអាហ្សង់ទីនវិញ ប៉ះក្រុមអេក្វាឌ័រនៅថ្ងៃទី១៣ក្នុងប្រកួតមិត្តភាព៕ប្រភព៖ Dailymail
