Essam El-Hadary អ្នកចាំទីវ័យ៤៥ឆ្នាំរបស់អេហ្ស៊ីប បានជាប់ឈ្មោះជាអ្នកចាំទីចាស់ជាងគេបំផុតក្នុងប្រវត្តិសាស្ត្រ FIFA World Cup ក្រោយពីបានបង្ហាញខ្លួនកាលពីយប់មិញនេះ។
អេហ្ស៊ីប ប្រកួតចុងក្រោយយប់មិញនេះ មិនទទួលបានផលល្អនោះទេ។ ផ្ទុយទៅវិញ ពួកគេបានបរាជ័យ ២-១ ក្រោមថ្វីជើងរបស់ក្រុមអារ៉ាប៊ីសាអ៊ូឌីត។ តែទោះជាយ៉ាងនេះក្ដី អេហ្ស៊ីបក៏បានជាប់កំណត់ត្រាមួយក្នុងប្រវត្តិសាស្ត្រ World Cup ផងដែរ ពោលគឺអ្នកចាំទីរបស់គេ ជាប់ឈ្មោះជាអ្នកចាំទីចាស់ជាងគេក្នុងប្រវត្តិសាស្ត្រ មានវ័យដល់៤៥ឆ្នាំទៅហើយ តែអាចលេងបាន។
Hadary បច្ចុប្បន្នលេងនៅក្លឹប Taawon ក្នុងលីគលំដាប់ទី១របស់ប្រទេសអារ៉ាប៊ីសាអ៊ូឌីត។ អ្នកចាំទីរូបនេះ ជាប់ជម្រើសជាតិអេហ្ស៊ីបតាំងពីឆ្នាំ១៩៩៦មកម្ល៉េះ ដោយបានបង្ហាញខ្លួន១៥៩ប្រកួតមកហើយ។ Hadary ជាប់លេខ១ជាកីឡាករចាស់ជាងគេ ខណៈដែលលេខ២នោះ បានទៅលើកីឡាករ Faryd Mondragon របស់កូឡុំប៊ី វ័យ៤៣ឆ្នាំ ដែលបង្ហាញខ្លួនកាលពី World Cup 2014 កន្លងទៅ៕ប្រភព៖DailyMail
