ផ្ទះរបស់កីឡាករ Thomas Partey ត្រូវបានចោរចូលជាថ្មីម្ដងទៀតហើយ ត្រឹមរយៈពេលតែ៤ថ្ងៃប៉ុណ្ណោះ ក្រោយពីធ្វើសកម្មភាពលើកទី១។
កាលពីថ្ងៃសុក្រសប្ដាហ៍មុននេះ ក្រុមចោរមួយក្រុមបានចូលទៅផ្ទះរបស់កីឡាករ Thomas ប៉ុន្តែមិនបានលួចយកអ្វីឡើយ ដោយសារតែជួបជាមួយសាច់ញាតិរបស់កីឡាកររូបនេះស្នាក់នៅក្នុងផ្ទះនោះ។ រំលងបានតែប៉ុន្មានថ្ងៃ ពោលគឺយប់មិញនេះក៏ស្រាប់តែមានក្រុមចោរមួយក្រុមទៀត (មិនច្បាស់ថាក្រុមលើកមុន) បានចូលទៅផ្ទះរបស់កីឡាករក្រុម AT Madrid នេះទៀត។
ការចូលមកលើកនេះ ប្រភពមិនបានបញ្ជាក់ថាក្រុមចោរនេះបានលួចអ្វីខ្លះទេ ប៉ុន្តែអាចប្រាប់បានថាចោរចូលមកនោះ គឺអ្នកបម្រើក្នុងផ្ទះជាអ្នកទាន់ ហើយរាយការណ៍ទៅប៉ូលិស។ នៅអេស្ប៉ាញមានករណីជាច្រើនបានកើតឡើងលើកីឡាករ ដោយមានក្រុមចោរចូលក្នុងផ្ទះនេះ។ ក្លឹបបាល់ទាត់ក្នុងប្រទេសអេស្ប៉ាញ តែងតែប្រាប់ទៅកីឡាករក្នុងក្រុមទាំងអស់ថា ហាមបង្ហោះរូបផ្ទះនិងកន្លែងស្នាក់នៅរបស់ពួកគេ លើបណ្ដាញសង្គមជាដាច់ខាត ព្រោះមានជនឆ្លៀតឱកាសជាច្រើន តែងតែចង់ធ្វើបាបលើកីឡាករ៕ប្រភព៖ Dailymail
