លោក Carlos Queiroz គ្រូបង្វឹកក្រុមជម្រើសជាតិអ៊ីរ៉ង់ បានបញ្ជាក់ថាការឱ្យកែងរបស់ Cristiano Ronaldo គួរតែបានកាតក្រហម មិនមែនត្រឹមកាតលឿននោះទេ។
ការប្រកួតស្មើគ្នា ១-១ យប់មិញនេះបានធ្វើឱ្យព័រទុយហ្គាល់មានឱកាសឡើងវគ្គ១៦ក្រុមចុងក្រោយ ស្របពេលដែលអ៊ីរ៉ង់ត្រូវធ្លាក់ត្រឹមវគ្គក្នុងពូលនេះហើយ។ យ៉ាងណាមិញ បើនិយាយចំពោះការប្រកួតវិញ ឃើញថាមានការប៉ះទង្គិចគ្នាច្រើន តួយ៉ាងដូចជា កីឡាករ Ronaldo បានប៉ះកែងជាមួយកីឡាករ Morteza Pouraliganji របស់អ៊ីរ៉ង់។ មួយកែងនេះ បានធ្វើឱ្យអាជ្ញាកណ្ដាលត្រូវទៅពិនិត្យមើលវីដេអូ VAR ទើបអាចសម្រេចចិត្តបាន។
ក្រោយពីទៅពិនិត្យមើលយ៉ាងល្អិតល្អន់ហើយ អាជ្ញាកណ្ដាល Enrique Caceres បានសម្រេចចិត្តឱ្យកាតលឿងទៅលើកំហុសរបស់ Ronaldo ប៉ុន្តែមិនឱ្យដល់កាតក្រហមនោះទេ។ ចំពោះរឿងនេះហើយ បានធ្វើឱ្យលោក Queiroz គ្រូបង្វឹកក្រុមជម្រើសជាតិអ៊ីរ៉ង់បាននិយាយថា៖ “ការវាយកែងទៅលើដៃគូ បើតាមច្បាប់ត្រូវបានកាតក្រហម មិនថាម្នាក់ដែលវាយគេនោះជា Lionel Messi ឬ Cristiano Ronaldo នោះទេ”។
សូមបញ្ជាក់ថាបាន១ពិន្ទុយប់មិញនេះ ព័រទុយហ្គាល់ នឹងឈរលេខ២ក្នុងពូល B បានឡើងទៅវគ្គ១៦ក្រុមចុងក្រោយ ប៉ះជាមួយក្រុមអ៊ុយរុយហ្គាយដែលបានលេខ១ក្នុងពូល A ៕ប្រភព៖DailyMail
