Angel di Maria បានទម្លាយនូវពាក្យសម្តីប៉ុន្មានឃ្លារបស់ Lionel Messi ដែលអាចធ្វើឲ្យមិត្តរួមក្រុមអាហ្សង់ទីនស្រក់ទឹកភ្នែក ក្រោយពីបរាជ័យទល់ក្រុមម្ចាស់ផ្ទះប្រេស៊ីលនៅពានរង្វាន់ Copa America។
បរាជ័យលទ្ធផល ២-០ នាវគ្គពាក់កណ្តាលផ្តាច់ព្រ័ត្រ បានធ្វើឲ្យប្រធានក្រុម Messi មានការខកចិត្តជាខ្លាំង ហើយមកទល់ថ្មីៗ Di Maria ក៏បានសើរើរឿងចាស់ហើយនិយាយថា៖ “ក្រោយបិទការប្រកួតនោះ Messi និយាយពាក្យពិសេសជាច្រើនពេលយើងធ្លាក់ដោយថ្វីជើងប្រេស៊ីល”។
លោកបន្តប្រាប់ ESPN ថា៖ “Messi បានប្រាប់យើងថាគាត់មានមោទនភាពចំពោះក្រុមទាំងមូលដែលយើងបានកសាងនេះខ្លាំងណាស់ ត្បិតយើងទាំងអស់គ្នា ខ្លះមិនបានជុំគ្នាព្រោះមិនបានកោះហៅចូលរួមការប្រកួត ប៉ុន្តែក៏មានអារម្មណ៍ល្អសម្រាប់រយៈពេលប៉ុន្មានឆ្នាំមកនេះ”។
“Messi គាត់ក៏សង្កត់ធ្ងន់ពីការពុះពាររបស់យុវជនជំនាន់ក្រោយក្នុងការប្រើប្រាស់អាវជម្រើសជាតិអាហ្សង់ទីន ហើយប្រសិនពួកគេនៅតែបន្តផ្តល់ឲ្យដូចអ្វីដែលបានធ្វើនៅ Copa America នោះពួកគេនឹងសក្ដិសមទទួលបានជោគជ័យច្រើនជាងនោះថែមទៀត លុះពេលគាត់និយាយចប់ គ្រប់គ្នាបានស្រក់ទឹកភ្នែក ព្រោះវាពិតជារំជួលចិត្តអ្នករាល់គ្នាខ្លាំងមែនទែន ជាពិសេសគឺយុវជនជំនាន់ក្រោយតែម្តង”៕ ប្រភព៖ Sportskeeda
