ក្លឹប Juventus នឹងដេញថ្លៃយកកីឡាករ Pogba ពីក្រុម Manchester United នៅខែមករាឆ្នាំ២០២០ខាងមុខនេះ ក្រោយពីខកខានឱកាសកាលពីរដូវកាលដោះដូរកីឡាករកន្លងទៅ។
Pogba មានចិត្តចង់ចាកចេញពីក្រុម Manchester United តាំងពីមុនបើករដូវកាលនេះម្ល៉េះ ប៉ុន្តែដោយសារក្រុមបិសាចក្រហមដាក់តម្លៃខ្លួនគេថ្លៃពេក ទើបក្លឹបជាច្រើនមិនអាចយកបាន។ ក្នុងនោះ Juventus ក៏មានចំណាប់អារម្មណ៍ក្នុងការនាំយកអតីតខ្សែបម្រើដែលខ្លួនបណ្ដុះនេះទៅវិញដែរ។ បរាជ័យទិញយកនៅរដូវកាលមុន មិនធ្វើឱ្យក្រុមរបស់លោក Sarri ស្ដាយអ្វីនោះទេ ព្រោះនៅខែមករាខាងមុខ ពួកគេនឹងដាក់ដេញថ្លៃយកម្ដងទៀត។
បច្ចុប្បន្ននេះ ខ្សែបម្រើសញ្ជាតិបារាំងមិនសូវបានលេងឱ្យក្រុម Man Utd ឡើយ ព្រោះមានរបួសជាប់រហូត។ កត្តារបួសឥតល្ហែនេះហើយ ធ្វើឱ្យអ្នកគាំទ្រនៅ Old Trafford កាន់តែមិនសប្បាយចិត្តជាមួយ Pogba ទៀត ហើយឱកាសក្នុងការចាកចេញរបស់គេក៏នឹងមានកាន់តែច្រើននៅខែមករានេះដែរ៕
ប្រភព៖ DailyMail
