ខ្សែប្រយុទ្ធ Gonzalo Higuain បានបង្ហើបថានៅពេលចប់កុងត្រាជាមួយក្រុម Juventus ហើយ រូបគេនឹងផ្លាស់ទៅលេងនៅក្លឹបកំណើតរបស់ខ្លួន River Plate នាប្រទេសអាហ្សង់ទីនវិញហើយ។
កីឡាករខាងលើនៅសល់កុងត្រាជាមួយក្រុម Juventus ដល់ឆ្នាំ ២០២១ ពោលគឺនៅសល់២ឆ្នាំទៀត។ មានប្រភពជាច្រើនសួរទៅលើ Higuain ថានឹងបន្ដលេងនៅទីណាទៀត នៅពេលខាងមុខ មុនអស់កុងត្រានិងអស់កុងត្រា។ សាមីខ្លួនបានឆ្លើយថាមិនទាន់ដឹងច្បាស់នោះទេ ប៉ុន្តែអ្វីដែលគេដឹងគឺនៅសល់កុងត្រាជាមួយ Juventus ២ឆ្នាំទៀត។
ជាមួយនឹងការឆ្លើយបែបនេះដែរ កីឡាករវ័យ៣១ឆ្នាំក៏បានបង្ហើបទៀតថាគោលបំណងរបស់គេនៅមុនចូលនិវត្តន៍ពីបាល់ទាត់គឺទៅលេងនៅក្លឹបកំណើតរបស់ខ្លួន River Plate វិញ។ វាជាក្ដីស្រមៃរបស់គេ ចង់ទៅជួយក្រុមដែលធ្លាប់បណ្ដុះបណ្ដាលខ្លួនឱ្យមានថ្ងៃនេះ៕
ប្រភព៖ DailyMail
