Rodrygo កីឡាករប្រេស៊ីលវ័យក្មេង បង្ហាញខ្លួនឱ្យក្រុម Real Madrid ជាលើកដំបូងក៏រកគ្រាប់បាល់បាន១គ្រាប់ជួយក្រុមទៅហើយកាលពីប្រកួតសប្ដាហ៍ទី៦ La Liga កន្លងទៅ។
ខ្សែប្រយុទ្ធខាងលើនេះចំណាយពេល៩៣វិនាទី ក្រោយពីដូរចូលដើម្បីស្វែងរកគ្រាប់បាល់ដំបូងរបស់គេក្នុងការប្រកួតយកឈ្នះ Osasuna ២-០។ ការចំណាយពេលតិចក្នុងការប្រកួតដំបូងឱ្យក្លឹប Real Madrid ដើម្បីរកគ្រាប់បាល់ទី១នេះដែរ បានធ្វើឱ្យអ្នកគាំទ្រនឹកឃើញកាល Ronaldo ប្រេស៊ីល ដែលបង្ហាញខ្លួនលើកដំបូងដែរ ចំណាយពេលតែ៦២វិនាទីប៉ុណ្ណោះក៏រកបាន១គ្រាប់ដែរនៅឆ្នាំ២០០២។
តែទោះជាមានការចាប់ផ្ដើមស្រដៀងគ្នានេះមែន តែ Rodrygo បានប្រាប់ទៅអ្នកគាំទ្រថាកុំយកខ្លួនទៅប្រៀបជាមួយវីរបុរសប្រេស៊ីលអី ព្រោះនៅខុសគ្នាឆ្ងាយណាស់។ Ronaldo ជាកីឡាករល្អបំផុតលើលោក មិនថានៅក្លឹបនិងជម្រើសជាតិទេ លោកគឺជាកីឡាករដែលមិនអាចខ្វះបានសម្រាប់ក្រុមទាំងមូល។ ខណៈដែលខ្លួនគេវិញ ទើបតែមានការចាប់ផ្ដើមអាជីពប៉ុណ្ណោះ មិនអាចយកប្រៀបបានទេ៕
ប្រភព៖ DailyMail