ឥណ្ឌា​រំពឹង​តតាំង​មិត្តភាព​ទល់​ក្រុម​ជើង​ឯក​រង World Cup នៅ​ដើម​ឆ្នាំ​ ២០២០

នៅ​ដើម​ឆ្នាំ​​ក្រោយ ២០២០ ក្រុម​ជម្រើស​ជាតិ​ឥណ្ឌា​អាច​នឹង​បើក​ការ​ប្រកួត​ដ៏​សំខាន់​មួយ ដែល​ជា​ជំនួប​មិត្តភាព​រវាង​ក្រុម​ជើង​ឯក​រង​ក្រូអាត ​បន្ទាប់​ពី​ឆ្លងកាត់​កិច្ច​ប្រជុំ​ពិភាក្សា​មួយ​កាល​ពី​ពេល​កន្លង​ទៅ​នេះ។

តាម​សារព័ត៌មាន TOI ​បាន​ឲ្យ​ដឹង​ថា​សហព័ន្ធ​កីឡា​បាល់ទាត់​ឥណ្ឌា​ AIFF ​និង​សហព័ន្ធ​កីឡា​បាល់ទាត់​ក្រូអាត HNS ​បាន​ជជែក​លើ​ភាព​ដែល​អាច​ទៅ​រួច​ក្នុង​ការ​បើក​ព្រឹត្តិការណ៍​ប្រកួត​មិត្តភាព​នៅ​ពេល​ខាង​មុខ ជាមួយ​នឹង​ការ​ចុះ MOU រវាង​ជាតិសាសន៍​ទាំង​ពីរ។

អគ្គលេខាធិការ AIFF ​លោក Kushal Das ​បាន​មាន​ប្រសាសន៍៖ “នេះ​ជា​ការ​ជួប​ប្រជុំ​ជា​លើក​ដំបូង ដែល​វា​ពិត​ជា​ល្អ​មែនទែន ស្រប​ពេល​ដែល​ក្រូអាត​ប្រមូលផ្តុំ​ដោយ​ថ្នាលយុវជន​ដែល​កំពុង​អភិវឌ្ឍ​និង​ផលិត​បាន​នូវ​កីឡាករ​មាន​គុណភាព​ជា​ច្រើន ហើយ​ពួក​គេ​បាន​ឡើង​ទៅ​ដល់​វគ្គ​ផ្តាច់ព្រ័ត្រ World Cup ថែម​ទៀត បែប​នេះ​យើង​កំពុង​សិក្សា​ពី​លទ្ធភាព​ដែល​អាច​ប្រកួត​មិត្តភាព​រវាង​ប្រទេស​ទាំង​ពីរ ហើយ​កាលបរិច្ឆេទ​ជាក់លាក់​យើង​នឹង​លម្អិត​នៅ​ខែ​វិច្ឆិកា​ម្តង​ទៀត”។

បញ្ជាក់​ថា​ក្រូអាត​បាន​បរាជ័យ​នៅ​លទ្ធផល ៤-២ ទល់​ជម្រើស​ជាតិ​បារាំង​នៅ​វគ្គ​ផ្តាច់ព្រ័ត្រ World Cup ២០១៨ ក្នុង​ប្រទេស​រុស្ស៊ី ដោយ​កីឡាករ​លេចធ្លោ​បំផុត​របស់​ជាតិ​មួយ​នេះ​មាន​ដូច​ជា Luka Modric, Dejan Lovren, Ivan Rakitic, Mateo Kovacic និង Ivan Perisic ជា​ដើម៕ ប្រភព៖ FoxSportAsia

ភ្ជាប់ទំនាក់ទំនងជាមួយ CTS SPORT