យោងតាមសារព័ត៌មាន Le10Sport បានឲ្យដឹងថាក្លឹបយក្សបារាំង Paris Saint-Germain កំពុងឈរលើក្តីសង្ឃឹមនៃការចរចាកុងត្រាថ្មីជាមួយ Neymar Jr ដែលកីឡាករប្រេស៊ីលរូបនេះប៊ិះតែនឹងចាកចេញកាលពីរដូវក្តៅកន្លងទៅ។
Neymar ហាក់រងការចង់បានខ្លាំងពីបណ្តាក្លឹបយក្សនៅអឺរ៉ុប ជាពិសេសគឺក្លឹបចាស់ FC Barcelona ដែលមាន Lionel Messi ពុះកញ្រ្ជោលចង់បានខ្លាំងបំផុត។ ប៉ុន្តែការចរចារវាងភាគីទាំងសងខាងនាពេលកន្លងទៅ ពុំបានទទួលជោគជ័យនោះទេ ត្បិតអីក្លឹបអេស្ប៉ាញប្រើយុទ្ធសាស្រ្តជាថ្នូរលុយសុទ្ធ ឬថែមកីឡាករក៏ដោយ។
បញ្ជាក់ថាបុរសវ័យ ២៧ ឆ្នាំបានចាកចេញពី Barca មកចូលរួមនៅ PSG នាឆ្នាំ ២០១៧ ជាមួយតម្លៃខ្លួន ២២២ លានអឺរ៉ូ។ កុងត្រារបស់ខ្សែប្រយុទ្ធរូបនេះនឹងត្រូវផុតនៅឆ្នាំ ២០២២ ប៉ុន្តែក្លឹបយក្សបារាំងនឹងរិះរកគ្រប់វិធីដើម្បីបន្តចងជើង Neymar នៅរយៈពេលយូរថែមទៀត៕ ប្រភព៖ Goal