ក្រុម Liverpool បានយកឈ្នះលើក្រុម Chelsea ២-១ ក្នុងការប្រកួតលីគកំពូលអង់គ្លេស ដែលធ្វើឱ្យក្រុមនេះមានកំណត់ត្រាឈ្នះ១០០%តែម្ដងគិតត្រឹមសប្ដាហ៍ទី៦នេះ។
បាន៣ពិន្ទុបន្ថែមសម្រាប់ការប្រកួតខាងលើនេះដែរ បានធ្វើឱ្យក្រុមលោក Klopp ដាច់ពិន្ទុក្រុមលេខ២ Man City ដល់ទៅ៥ពិន្ទុហើយ។ តែ៥ពិន្ទុនេះ ក៏មិនទាន់ធ្វើឱ្យអ្នកចាត់ការអាល្លឺម៉ង់សប្បាយចិត្តនៅឡើយដែរ ត្បិតអីនេះជាការចាប់ផ្ដើមរដូវកាលប៉ុណ្ណោះ។ ក្នុងឱកាសនេះ លោកក៏បានលើកពីការយកឈ្នះ Watford ក្នុងលទ្ធផល ៨-០ របស់ក្រុមលោក Pep ដែរ។
Klopp បាននិយាយថា៖ “ប្រសិនបើវាអាចកើតឡើង នោះមានតែ Man City ប៉ុណ្ណោះ។ យើងធ្លាប់បរាជ័យនៅទីនោះ ម្ដងមកហើយ ៥-០ នៅពេល Mane បានកាតក្រហម។ លទ្ធផលដែលពួកគេធ្វើបាន ខ្ញុំមិនបារម្ភឡើយ ខ្ញុំអាចគេងលក់ ព្រោះក្រុម Man City ជាក្រុមល្អបំផុតនៅលើលោកនេះ។ ខ្ញុំមិនចង់ផ្ដោតតែលើ២ក្រុមនេះទេ ការឈ្នះពាននឹងត្រូវដឹងនៅពេលចប់រដូវកាល យើងនៅសល់៣២ប្រកួតទៀត”៕ប្រភព៖ Dailymail
