ខ្សែប្រយុទ្ធ Keisuke Honda ម្ចាស់ក្លឹបសូទីឡូអង្គរលេងនៅលីគកំពូលកម្ពុជា បានជួយក្រុមជម្រើសជាតិជប៉ុន យកបាន១ពិន្ទុពីក្រុមសេណេហ្គាល់ ដើម្បីឡើងឈរកំពូលតារាងក្នុងពូល H ។
មួយគូនេះពិតជាស្វិតស្វាញមែនទែន ដោយសារតែក្រុមជប៉ុននិងសេណេហ្គាល់ មានសមត្ថភាពប្រហាក់ប្រហែលគ្នា។ សេណេហ្គាល់ ធ្វើបានសម្រេចគ្រាប់បាល់មុនដោយកីឡាករ Mane ត្រឹមនាទី១១ប៉ុណ្ណោះ។ យ៉ាងណាមិញ ការនាំមុខនេះបានត្រឹម២០នាទីទេ ពោលគឺជប៉ុនតាមបានស្មើវិញហើយដោយកីឡាករ Inui នៅនាទី៣៤។ ចូលដល់តង់ទី២វិញ Wague របស់សេណេហ្គាល់ រកបាន១គ្រាប់នាំមុខជាថ្មីនៅនាទី៧១ តែការនាំមុខនេះក៏ដូចលើកមុន ត្រឹម៧នាទីបន្ទាប់ Honda រកបានគ្រាប់បាល់តាមបានស្មើជាថ្មី។ ចប់ការប្រកួត ជប៉ុន ២-២ សេណេហ្គាល់។
លទ្ធផលស្មើយប់មិញនេះ បានធ្វើឱ្យជប៉ុនឈរនៅកំពូលតារាងក្នុងពូល H នេះតែម្ដង ឆ្លងកាត់២ប្រកួតឈ្នះ១ស្មើ១ មាន៤ពិន្ទុ។ យ៉ាងណាមិញ ការឈរកំពូលតារាងនេះ នៅមិនទាន់ធានាបានកៅអីឡើងវគ្គ១៦ក្រុមចុងក្រោយនោះទេ ដោយត្រូវរង់ចាំមើលប្រកួតចុងក្រោយសិន ប៉ះជាមួយក្រុមប៉ូឡូញ ប្រសិនបើជប៉ុនឈ្នះឬស្មើ នោះពួកគេនឹងបានឡើងវគ្គ១៦ក្រុមចុងក្រោយហើយ៕ប្រភព៖ DailyMail
