កន្លងទៅបន្ទាប់ពីបរាជ័យក្រោមថ្វីជើង PSG ៣-០ រូបមួយសន្លឹកនៃការថត Selfie រវាង Kylian Mbappe និង Areola ដែលគ្រងឈុត Real Madrid បានផ្ទុះការរិះគន់មិនសំចៃមាត់នៅលើបណ្តាញសង្គម។
លុះចូលមកដល់ព្រឹកថ្ងៃសុក្រនេះ អ្នកចាំទីដៃទីពីររបស់ស្តេចស Areola បានចេញមុខបកស្រាយទៅកាន់អ្នកគាំទ្រទាំងមូលហើយ។ លោកបានសរសេរសារលើបណ្តាញសង្គមថា៖ “ផ្ញើទៅកាន់អ្នកគាំទ្រReal Madrid ទាំងអស់ ខ្ញុំពិតជាមិនសប្បាយចិត្តនឹងការបញ្ចេញមតិមួយចំនួននៅលើរូបថតមួយសន្លឹកនោះទេ”។
លោកបន្ត៖ “ខ្ញុំចង់ឲ្យអ្នកគាំទ្រទាំងអស់ដឹងដឹងថាបេះដូងរបស់ខ្ញុំបានប្រគល់ជូនក្លឹប Madrid ចាប់តាំងពីថ្ងៃទម្លាក់ចុងប៊ិចចុះហត្ថលេខាមកម្ល៉េះ ដោយទាំងភាពស្ម័គ្រស្មោះក៏នៅជាមួយ Real Madrid ទាំងមូលផងដែរ ដោយបរាជ័យកាលពីថ្ងៃម្សិលមិញក៏ប៉ះពាល់អារម្មណ៍ខ្ញុំដូចគ្នា ក៏ដូចជាអារម្មណ៍អ្នករាល់គ្នានាមជាគ្រួសារតែមួយ”។
លោកបន្ត៖ “តាមពិតទៅក្រោយបិទការប្រកួត ខ្ញុំគ្រាន់តែមានការជួបជុំជាមួយមិត្តរួមក្រុមចាស់និងមិត្តភក្តិ ព្រោះកន្លងមកយើងមិនទាន់មានទាំងពេលនិយាយពាក្យលា បែបណាមិញខ្ញុំក៏សុំធ្វើការអភ័យទោសដល់អ្នកគាំទ្រ Real Madrid ទាំងអស់ដែលមានអារម្មណ៍ថាប៉ះពាល់ ដោយវាពុំមែនជាគោលបំណងអ្វីនោះទេ ហើយខ្ញុំសង្ឃឹមថាយើងអាចសម្រេចភាពជោគជ័យទាំងអស់គ្នាទៅថ្ងៃមុខ”៕
ប្រភព៖ BeSoccer
