សម្រាប់រដូវកាលនេះ ក្លឹប Barcelona អាចនឹងក្លាយជាជាក្លឹបរកចំណូលបានជាច្រើនជាងគេបំផុត ជាង១ពាន់លានអឺរ៉ូ ខណៈដែលរដូវកាលមុនពួកគេរកបាន៩៩០លានអឺរ៉ូ។
សេចក្ដីប្រកាសពីក្លឹប Barcelona ផ្ទាល់ការពីម្សិលមិញនេះ បានបញ្ជាក់ថារដូវកាលមុនក្រុមយក្សអេស្ប៉ាញនេះរកចំណូលបាន៩៩០លានអឺរ៉ូ ហើយសម្រាប់រដូវកាលថ្មីនេះវិញ ពួកគេរំពឹងថាចំណូលនឹងកើតដល់១,០៤ពាន់លានអឺរ៉ូឯណោះ។ ប្រសិនបើរដូវកាលនេះពួកគេធ្វើបានមែន នោះក្លឹបជាក្លឹបបាល់ទាត់ដំបូងគេដែលរកចំណូលបានលើស១ពាន់លានអឺរ៉ូហើយក្នុង១រដូវកាល។
ចំណូលយ៉ាងច្រើនសន្ធឹកសន្ធាប់នេះ រកបានពីការលក់សំបុត្រ និងប្រាក់រង្វាន់នានា ដែលក្រុមចូលលេង។ មួយចំណែកធំទៀត គឺបានពី Sponsor នានា ដែលធ្វើឱ្យក្រុមនេះទទួលបានប្រាក់ចំណូលយ៉ាងច្រើនមួយឆ្នាំៗ។ យ៉ាងណាមិញ ទន្ទឹមនឹងការរកចំណូលបានយ៉ាងច្រើននេះដែរ ក្លឹបក៏មានចំណាយច្រើនណាស់ដែរ។ រដូវកាលនេះ ពួកគេព្យាករណ៍ថាអាចនឹងចំណាយដល់ទៅ១ពាន់លានអឺរ៉ូឯណោះ ដើម្បីទ្រទ្រង់ក្លឹប។ ដូច្នេះហើយ បើធៀបប្រាក់ចំណូលរកបាន និងប្រាក់ចំណាយ គឺក្រុមBarcelona នៅតែរកមិនបានប្រាក់ចំណេញច្រើនខ្លាំងនោះទេ៕ប្រភព៖ Dailymail