កីឡាការិនី Xiong Jing Nan ឬ ហៅថា «The Panda» ប្រឈមមុននឹងគូប្រកួតខ្លាំងក្នុងអាជីពរបស់ខ្លួននៅសង្វៀន ONE: CENTURY នាថ្ងៃទី ១៣ ខែ តុលា ខាងមុខនៅក្រុងតូក្យូប្រទេសជប៉ុន។ កីឡាការិនីជើងខ្លាំងចិន នឹងជួបនារីកំណាច Angela Lee ឬ គេឲ្យរហស្សនាមថា «Unstoppable» ដែលជាម្ចាស់ខ្សែក្រវាត់ ONE Women’s Atomweight World Title និង ត្រូវគេចាត់ទុកថាជាកីឡាការិនីគុនចម្រុះល្អបំផុតក្នុងប្រវត្តិសាស្ត្រ។ នេះជាឱកាសដែល «The Panda» អាចនឹងចារឈ្មោះក្នុងប្រវត្តិសាស្ត្រដើម្បីស្វែងរកខ្សែក្រវាត់ទី២នៅសង្វៀនលំដាប់ពិភពលោក បន្ទាប់ពីរូបគេបានឈ្នះការប្រកួតចុងក្រោយកាលប្រកួតនាចុងខែ មីនា កន្លងទៅនៅសង្វៀន ONE : NEW ERA។
Xiong Jing Nan ថ្លែងមុនប្រកួតថា ៖«ខ្ញុំតប់ប្រមល់ណាស់ ហើយគិតលើសកម្រិតទៀតផង។ ខ្ញុំមិនចង់ធ្វើឲ្យមនុស្សដែលគាំទ្រ និង ស្រលាញ់ ខ្ញុំខកចិត្តនោះទេ។ វាមានសម្ពាធច្រើនណាស់។ រឿងសំខាន់នោះ គឺត្រូវតែលើកទឹកដើម្បីទទួលជ័យជម្នះ»។ កីឡាការិនីវ័យ ៣០ ឆ្នាំរូបនេះមានភាពតានតឹងដោយសារគិតច្រើន ហើយពេលខ្លះជះឥទ្ធិពលដល់ការហ្វឹកហាត់ទៀតផង។ កីឡាការិនីដែលមានស្រុកកំណើតមកពីខេត្ត Shandong បន្តជម្នះភាពស្មុគស្មាញនិងតប់ប្រមល់ដើម្បីស្ដារទំនុកចិត្តដល់ការហ្វឹកហាត់។
Xiong Jing បញ្ជាក់ថា៖«ទម្លាប់ល្អមួយគឺ ខ្ញុំត្រូវផ្លាស់ប្ដូរភាពតឹងអារម្មណ៍ទៅជាការខំប្រឹងប្រែងទៅវិញ។ ខ្ញុំអាចនិយាយរឿងដែលអាចលើកទឹកចិត្តខ្លួនឯង។ ខ្ញុំនិយាយនៅមុខកញ្ចក់ ថាអាចធ្វើបាន ឬ អត់។ បើខ្ញុំធ្វើមិនបានទេ ខ្ញុំទៅស្លាប់ល្អជាង»។
កីឡាការិនីចិនសង្កត់ធ្ងន់ទៀតថា៖«ខ្ញុំនិយាយមកកាន់ខ្លួនឯងពាក្យអាក្រក់ៗនៅមុខកញ្ចក់។ វាជាការជំរុញទឹកចិត្តមួយ ពេលខ្ញុំអស់កម្លាំង និង មានអារម្មណ៍ខ្ជិលច្រអូស។ ពេលនរណាម្នាក់និយាយពាក្យបែបនេះមកចំកណ្ដាលមុខរបស់ខ្ញុំ ខ្ញុំច្បាស់ជាភ្ញាក់ខ្លួនហើយបន្តធ្វើការងារទៀត។ ប៉ុន្តែ ខ្ញុំត្រូវតែនិយាយខ្លួនឯង។ ខ្ញុំតែងតែរំលឹកនិងប្រាប់ខ្លួនឯងជារឿយៗ»។
កូនសិស្សមកពីក្លិប Bali MMA រៀបរាប់បន្តថា ពេលខ្លះអានសៀវភៅ, ការកត់ត្រាគំនិតអវិជ្ជមានដើម្បីលុបបំបាត់, ការស្ដាប់ចម្រៀង និងការគូររូបលេងក៏អាចកាត់បន្ថយភាពតានតឹងដែរ។ ទោះជាយ៉ាងណាក្ដី The Panda មិនទាន់ចាញ់ Lee ទាល់តែសោះក្នុងការប្រកួត៤លើកចុងក្រោយ។ ប៉ុន្តែពេលនេះនៅសង្វៀន ONE: CENTURY គឺជាការប្រកួតដ៏តានតឹងបំផុត ព្រោះ Xiong នឹងឡើងដណ្ដើមខ្សែក្រវាត់ ហើយកីឡាការិនីរូបនេះមានសម្ពាធយ៉ាងខ្លាំង។ វីរនារីមកពីចិនសង្ឃឹមថានឹងទទួលបានល្អលទ្ធផលដូចក្នុងជំនួបលើកដំបូង។
បែបណាក្ដី The Panda នៅតែអះអាងថា រូបគេនឹងប្រើភាពគិតអវិជ្ជមាន និង អារម្មណ៍សម្ពាធមុនការប្រកួតទៅជាការខិតខំប្រឹងប្រែងដើម្បីទទួលជ័យជម្នះត្រលប់មកវិញ។ «ខ្ញុំមានសុបិនមួយ និង បន្តអភិវឌ្ឍខ្លួនឲ្យកាន់តែល្អ។ ខ្ញុំជឿជាក់លើខ្លួនឯង។ ខ្ញុំនឹងល្អឡើងៗ ពីមួយប្រកួតទៅមួយប្រកួត»។ Xiong តាំងចិត្តបែបនេះ។