ម្ចាស់ដីនៃក្លឹប Paris Saint-Germain នឹងបើកកីឡដ្ឋានស្វាគមន៍ក្លឹប Real Madrid នៅជំនួបជុំទី ១ វគ្គចែកពូលនៅរាត្រីនេះ។ កន្លងទៅការលេងក្នុងដីបារាំងស្តេចសក៏មានភាគរយឈ្នះច្រើនជាង ប៉ុន្តែនៅយប់នេះបេក្ខភាពអវត្តមានដោយសារបញ្ហារបួសហាក់មានច្រើនរវាងក្រុមទាំងសងខាង ដែលធ្វើឲ្យលំបាកនឹងព្យាករណ៍ខ្លាំងមែនទែន។
យ៉ាងណាមិញបង្វែរទៅមើលការផ្តល់បទសម្ភាសន៍របស់អ្នកចាត់ការលោក Thomas Tuchel មុនឈានដល់ការប្រកួត លោកបានលើកសរសើរដល់ខ្សែប្រយុទ្ធ Karim Benzema នៃគូបដិបក្ខដែលថាអាចនឹងបង្កបញ្ហាលំបាកបំផុតសម្រាប់កូនក្រុមខ្លួន។
លោកនិយាយថា៖ “Benzema គឺជាកីឡាករដ៏ល្អបំផុតមួយក្នុងលោក តាមពិតទៅយើងមិនខ្លាចគាត់ទេ ប៉ុន្តែពេលនេះគាត់ជាអ្នកដឹកនាំមួយ ហើយទទួលស្គាល់ថាវាពិតជាលំបាកក្នុងការតាមបិទគាត់”។
លោកបន្តទៀតថា៖ “សម្រាប់ការលេងយើងនឹងព្យាយាមគ្រប់គ្រងបាល់ឲ្យបានច្រើន ពោលគឺខ្ញុំមិនចង់ឲ្យខាង Madrid មានឱកាសច្រើនទេ ព្រោះពួកគេជាក្លឹបរឹងមាំនិងក្លាហានបំផុតនៅ Champons League ទាំងដែលពួកគេឈ្នះជោកជាំហើយ”៕ ប្រភព៖ BeSoccer