ប្រធាន​ក្រុម Liverpool ៖ យើង​ចង់​ឈ្នះ UCL ​ទៀត​ឆ្នាំ​នេះ ​

Jordan Henderson ​ប្រធាន​ក្រុម Liverpool ​បាន​និយាយ​ថា​ចង់​ឈ្នះ​ពាន​រង្វាន់ UEFA Champions League ​ទៀត​នៅ​ឆ្នាំ​នេះ ​ព្រោះ​សមាជិក​ក្រុម​កំពុង​ចង់​បង្កើត​ប្រវត្តិសាស្ត្រ​ថ្មី។

នៅ​រាត្រី​នេះ ក្រុម Liverpool ​នឹង​ត្រូវ​តតាំង​ជាមួយ​ក្រុម​ម្ចាស់​ផ្ទះ Napoli ​ក្នុង​វគ្គ​សន្សំ​ពិន្ទុ​តាម​ពូល​ពាន​រង្វាន់ UEFA Champions League ។ ​នេះ​ជា​ការ​ជួប​គ្នា​ឆ្នាំ​ទី​២​ហើយ សម្រាប់​ក្រុម​ទាំង​ពីរ ​ដោយ​ឆ្នាំ​មុន​ក្នុង​វគ្គ​នេះ ​ពួកគេ​ក៏​នៅ​ពូល​ជាមួយ​គ្នា​ផង​ដែរ។ ដោយ​គ្រា​នោះ​នៅ​ទឹក​ដី​អ៊ីតាលី ​ក្រុម​ហង្ស​ក្រហម​ចាញ់​ក្នុង​លទ្ធផល ១-០។

សម្រាប់​ឆ្នាំ​នេះ​វិញ Henderson បាន​និយាយ​ក្នុង​សន្នីសីទ​កាសែត​ថា​៖ “ឆ្នាំ​មុន​យើង​មក​ទីនេះ​លេង​មិន​ល្អ​នោះ​ទេ។ ខ្ញុំ​នៅ​ចាំ​គ្រា​នោះ អ្វី​ដែល​ជា​កំហុស​ឆ្គង​របស់​យើង។ ហើយ​ខ្ញុំ​គិត​លើក​នេះ ​វា​នឹង​មិន​កើត​ឡើង​ម្ដង​ទៀត​ឡើយ។ សង្ឃឹម​ថា​នៅ​រាត្រី​នេះ លទ្ធផល​នឹង​ប្រែប្រួល​ខុស​ពី​ឆ្នាំ​មុន។ នៅ​ឆ្នាំ​នេះ ក្រុម​របស់​យើង​ចង់​ការពារ​តំណែង​ជើង​ឯក​ពាន​រង្វាន់​នេះ​ឱ្យ​បាន”៕ប្រភព៖ Dailymail

ភ្ជាប់ទំនាក់ទំនងជាមួយ CTS SPORT