Real Madrid ហាក់មានភាពចុះថមថយច្រើននៅតំបន់បម្រើសម្រាប់រដូវកាល ២០១៩/២០ នេះ ជាហេតុធ្វើឲ្យលោក Zinedine Zidane បានព្យាយាមរំអុកឲ្យក្លឹបលៃលកយកកីឡាករសំខាន់ណាមួយរូបមកជួយជាចាំបាច់។
ក្នុងចំណោមនោះមុខព្រួញដែល Madrid តម្រង់ចង់បាន ក៏រួមមានកីឡាករដាណឺម៉ាក Christian Eriksen ដែលត្រៀមផុតកុងត្រាជាមួយ Tottenham Hotspur ផងដែរ ប៉ុន្តែតាមរយៈសាមីខ្លួនផ្ទាល់ហាក់មានចិត្តចង់ទៅចូលរួមនៅក្លឹប Juventus វិញហើយ។ នេះបើយោងតាមសារព័ត៌មាន Don Balon បានចុះផ្សាយ។
អាចជាយុទ្ធសាស្រ្តទាក់ទាញដ៏ល្អមួយរបស់ភាគីខាងសេះបង្កង់ ព្រោះឲ្យតែបណ្តាកីឡាករកៀកផុតកុងត្រា មិនងាយនឹងឆ្លងផុតពីការបញ្ចុះបញ្ចូលរបស់ Juventus ឡើយ។ ប្រសិនអាចយកបាន Eriksen ក៏អាចថាជាចំណែកដ៏សំខាន់ក្នុងការជួយចែកបាល់ឲ្យ Ronaldo នៅតំបន់ប្រយុទ្ធផងដែរ៕ ប្រភព៖ FoxSportAsia