• គ្រូ​បង្វឹក​អង់គ្លេស ព្រមាន​កូន​ក្រុម ​កុំ​លេង​ល្បិច ព្រោះ VAR ​ដឹង​គ្រប់​យ៉ាង

    លោក Gareth Southgate ​គ្រូ​បង្វឹក​ក្រុម​ជម្រើស​ជាតិ​អង់គ្លេស ​បាន​ព្រមាន​ដល់​កូន​ក្រុម​ទាំង​អស់​ថា​កុំ​លេង​ល្បិច​នៅ World Cup ​ឆ្នាំ​នេះ ​ត្បិត​អី​អាជ្ញាកណ្ដាល​មាន​វីដេអូ (VAR) ​សម្រាប់​មើល​ជា​និច្ច ​មិន​អាច​បន្លំ​បាន​ឡើយ។

    អង់គ្លេស ត្រូវ​ប៉ះ​ជាមួយ​ក្រុម​ប៉ាណាម៉ា នា​ល្ងាច​ម៉ោង​៧​នេះ ​ក្នុង​ការ​ប្រកួត​ទី​២​របស់​ពួកគេ។ នេះ​ជា​ប្រកួត​សំខាន់​មែនទែន​សម្រាប់​អង់គ្លេស ដើម្បី​មាន​ឱកាស​ឡើង​ទៅ​វគ្គ​បន្ដ​បាន។ មួយ​វិញ​ទៀត ប្រសិន​បើ​ឈ្នះ​ប្រកួត​នេះ ​ពួកគេ​ក៏​នឹង​ងាយ​ស្រួល​ក្នុង​ការ​លេង​ទល់​ក្រុម​បែលហ្សិក​នៅ​ប្រកួត​ចុង​ក្រោយ​ផង​ដែរ។

    ជាមួយ​នឹង​ការ​ប្រកួត​ជិត​ចូល​មក​ដល់​នេះ​ដែរ ​លោក Gareth Southgate ​បាន​ប្រាប់​ទៅ​កូន​ក្រុម​ថា​៖ “យើង​នឹង​ប្រុងប្រយ័ត្ន​ឱ្យ​ខ្លាំង​បំផុត ​មិន​ឱ្យ​មាន​កំហុស​ឡើយ។ ខ្ញុំ​បាន​មើល​ការ​ប្រកួត​មុន​ៗ​អស់​ហើយ VAR ​ពិត​ជា​ធ្វើ​បាន​ល្អ និង​មិន​ឱ្យ​កីឡាករ​លេង​ល្បិច​នោះ​ទេ។ អ្វី​ដែល​ខ្ញុំ​ផ្ដាំ​ទៅ​កូន​ក្រុម​គឺ​ត្រូវ​កាត់​បន្ថយ​ការ​បង្កើត​កំហុស ​ជា​ពិសេស​ក្នុង​តំបន់​មុខ​ទី និង​តំបន់​គ្រោះ​ថ្នាក់”។

    បច្ចេកវិទ្យា VAR ​ពិត​ជា​ធ្វើ​ឱ្យ​ការ​ប្រកួត​មិន​លំអៀង​មែន តួយ៉ាង​ដូចជា​ការ​ប្រកួត​រវៀង​ប្រេស៊ីល ជាមួយ​ក្រុម​កូស្ដារីកា​អីចឹង។ ​ខ្សែ​ប្រយុទ្ធ​ Neymar ​បាន​ធ្វើ​ពុត​ជា​ដួល ​ហើយ​អាជ្ញាកណ្ដាល​បាន​ផ្ដល់​បាល់​ពិន័យ​១១​ម៉ែត្រ​នៅ​គ្រា​នោះ។ យ៉ាងណាមិញ ​ក្រោយ​ពី​មាន​ការ​តវ៉ា លោក​អាជ្ញាកណ្ដាល​បាន​ទៅ​ពិនិត្យ VAR ​ទើប​ឃើញ​ថា​ពិត​ជា​ធ្វើ​ពុត​មែន ​ហើយ​ក៏​ដក​ការ​ឱ្យ​បាល់​ប៉េណាល់ទី​នោះ​វិញ៕ប្រភព​៖ DailyMail

     

     

    ភ្ជាប់ទំនាក់ទំនងជាមួយ CTS SPORT