លោក Van Marwijk គ្រូបង្វឹកក្រុមជម្រើសជាតិអារ៉ាប់រួម បានបន្ទោសស្មៅធម្មជាតិរបស់កីឡដ្ឋានជាតិ Bukit Jalil ម៉ាឡេស៊ីថាអន់ ពិបាកលេងបាល់លឿន។
ក្រុមអារ៉ាប់រួម បានយកឈ្នះលើក្រុមម៉ាឡេស៊ី ក្នុងលទ្ធផល ២-១ ក្នុងការប្រកួតជម្រុះ World Cup 2022 កន្លងទៅនេះ។ បើទោះជាឈ្នះមែន ប៉ុន្តែលោក Van មិនសប្បាយចិត្តនៅពេលឃើញកូនក្រុមលេងលើស្មៅមិនល្អដូច្នេះទេ។ លោកថាស្មៅនៅទីលានBukit Jalil មិនសក្ដិសមសម្រាប់ការលេងបាល់ ឱ្យល្អមើលឡើយ។
អតីតគ្រូដែលដឹកនាំក្រុមហុល្លង់ឡើងដល់វគ្គផ្ដាច់ព្រ័ត្រ World Cup 2010 បាននិយាយក្រោយចប់ការប្រកួតនោះថា៖ “នេះជាកីឡដ្ឋានស្អាតមួយនៅលើលោក ដែលខ្ញុំធ្លាប់ឃើញ។ តែគួរឱ្យអាណិតស្មៅក្នុងកីឡដ្ឋាននេះ មិនល្អនោះទេ វាពិបាកក្នុងការលេងបាល់លឿន មិនមែនតែក្រុមខ្ញុំឡើយ សូម្បីម្ចាស់ផ្ទះម៉ាឡេស៊ីក៏ពិបាកដូចគ្នា។ វាមានស្មៅមិនល្អ ប៉ុន្តែកីឡដ្ឋាននេះស្អាតណាស់”។ ក្នុងការប្រកួតរវាងក្រុមទាំងពីរនេះ មានអ្នកគាំទ្រចូលទស្សនាជាង៤ម៉ឺននាក់ ខណៈដែលកីឡដ្ឋាននេះផ្ទុកមនុស្សបានជាង៨ម៉ឺននាក់៕ប្រភព៖ Foxsportsasia