សហព័ន្ធបាល់ទាត់អន្តរជាតិ FIFA នឹងបញ្ជូនក្រុមការងារទៅអ៊ីរ៉ង់ ដើម្បីចរចាបើកផ្លូវឱ្យស្ត្រីក្នុងប្រទេសនេះ បានចូលទស្សនាការប្រកួតបាល់ទាត់អន្តរជាតិបាន។
ការប្រកាសរបស់ FIFA នេះកើតឡើងក្រោយពីមានស្ត្រីម្នាក់បានដុតសម្លាប់ខ្លួន ក្រោយពីដឹងថាត្រូវជាប់គុក៦ឆ្នាំពីបទព្យាយាមចូលកីឡដ្ឋានទស្សនាការប្រកួតបាល់ទាត់ ដោយបានក្លែងបន្លំជាបុរស។ FIFA បានបញ្ជាក់ថាគោលបំណងធំរបស់ពួកគេគឺចង់ផ្ដល់សិទ្ធិសេរីភាពដល់ស្ត្រីមិនថាប្រទេសណានោះទេ ដោយបានចូលទស្សនានិងគាំទ្រការប្រកួតបាល់ទាត់ ដែលជាកីឡាមួយផ្ដល់សេរីភាព និងភាពសប្បាយចិត្តរីករាយដល់អ្នកគាំទ្រ។
អ៊ីរ៉ង់បានបិទសិទ្ធិនារីចូលមើលការប្រកួតបាល់ទាត់តាំងពីឆ្នាំ១៩៨១មក ដោយអះអាងថាជារឿងមិនល្អសម្រាប់ប្រទេសនេះដែលឱ្យស្ត្រីចូលមើលកីឡាប្រើកម្លាំង។ យ៉ាងណាមិញ នៅប៉ុន្មានឆ្នាំចុងក្រោយនេះ ទាំងរដ្ឋមន្ត្រីផ្នែកកីឡារបស់អ៊ីរ៉ង់ និងមានការជួយជ្រោមជ្រែងពីខាង FIFA ផង មិនយូរមិនឆាប់ ច្បាប់ហាមនារីចូលមើលបាល់ទាត់ អាចនឹងត្រូវដកចោលវិញហើយ៕ប្រភព៖ Bangkokpost
