ដឹង​មូលហេតុ​ដែល​មេ​ធំ Valencia ដក​តំណែង​អ្នកចាត់ការ​របស់ Marcelino ហើយ

ត្បិត​អាច​ជួយ​ឲ្យ​ក្លឹប​ឈ្នះ Copa del Rey និង​ឡើង​មក​ឈរ​តំណែង​លេខ ៤ នៅ​ក្របខ័ណ្ឌ LaLiga ក៏​តំណែង​របស់​អ្នកចាត់ការ​លោក Marcelino ​ត្រូវ​បាន​ដក​ចោល​ដដែល ទាំង​ដែល UCL រដូវ​កាល​ថ្មី​មិន​ទាន់​បាន​តតាំង​ផង​នោះ។

ជុំវិញ​រឿងរ៉ាវ​នេះ​ត្រូវ​បាន​សារព័ត៌មាន Marca ចុះ​ផ្សាយ​ថា​ក្លឹប Valencia ​បាន​ទាក់ទង​ទៅ​កាន់​លោក Albert Celades ជុំវិញ​ការ​ត្រៀម​មក​ជំនួស​តំណែង​របស់ Marcelino តាំង​តែ​ពី​ ២ សប្តាហ៍​មុន​មក​ម្ល៉េះ។ មូលហេតុ​ដែល​ឈាន​ដល់​ការ​សម្រេច​បែប​នេះ ក៏​ដោយ​សារ​តែ​លោក Peter Lim ជា​ប្រធាន​ក្លឹប​មាន​ការ​មិន​ពេញ​ចិត្ត​នូវ​សម្តី​របស់​គ្រូ​ចាស់ ដែល​ស​បង្ហាញ​ពី​ការ​មិន​គោរព​ដល់​ក្លឹប​ទាំង​មូល។

កន្លង​មក Marcelino ធ្លាប់​បាន​និយាយ​ថា៖ “ក្លឹប​ធ្លាប់​បាន​ប្រាប់​ខ្ញុំ​ថា Rafinha នឹង​មក​ចូលរួម​ឡើយ បែប​នេះ​ក្រុម​របស់​យើង​មើល​ទៅ​កាន់​តែ​ស្តួចស្តើង​បន្តិច​ហើយ មួយ​ផ្សេង​ទៀត​ប្រសិន Rodrigo ចាកចេញ នោះ​យើង​ក៏​ចាំបាច់​ត្រូវ​ការ​ផ្លាស់ប្តូរ​ជា​បន្ទាន់”។

លោក​បន្ត​ថា៖ “យើង​មើល​ទៅ​ការ​វិនិយោគ​របស់​ក្លឹប​ផ្សេង​ទៀត​ដូច​ជា Sevilla, Real Betis ​គឺ​ពិត​ជា​ធ្វើ​ឲ្យ​យើង​លំបាក​ខ្លាំង​នៅ​រដូវ​កាល​ក្រោយ”។ ការ​យល់​ឃើញ​នូវ​សម្តី​លើក​ឡើង​ទាំង​នេះ​ហើយ ជា​ដើមចម​ដែល​ធ្វើ​ឲ្យ​តំណែង​របស់ Marcelino ​ត្រូវ​បាន​ដក​ចេញ​ដោយ​គ្មាន​ស្តាយ​ស្រណោះ៕ ប្រភព៖ Marca

ភ្ជាប់ទំនាក់ទំនងជាមួយ CTS SPORT